Epşteyn sənədləri yeni adları üzə çıxarır
Ceffri Epşteynlə bağlı açıqlanan yeni sənədlər Fransada siyasi rezonans doğurub. Qərb mediasında yer alan məlumatlara görə, Fransanın sabiq iqtisadiyyat və maliyyə naziri Bruno Le Maire Epşteynin evində onunla görüşüb. Bu fakt nazirə yaxın mənbələr tərəfindən də təsdiqlənib.
E-poçt yazışmaları görüşü təsdiqləyir
Sənədlərdə sabiq Fransa prezidenti Nikola Sarkozinin müşaviri olmuş Olivye Kolom ilə Ceffri Epşteyn arasında müxtəlif tarixlərdə aparılmış elektron yazışmalar yer alır. Həmin yazışmalar Le Mairenin Kolom tərəfindən Epşteynlə görüşmək üçün milyarderin evinə aparıldığını göstərir.
Məlumatlara əsasən, bu görüş Epşteynin Nyu-Yorkdakı şəxsi iqamətgahında baş tutub və Le Maire burada iş dünyasından olan şəxslərlə tanış edilib.
Yaxın çevrəsi danışdı
“Politico” nəşrinə anonimlik şərti ilə danışan Le Mairenin yaxın çevrəsi bildirib ki, sabiq nazir 2013-cü ilin sentyabrında Kolomun dəvəti ilə Nyu-Yorkda bir evdə keçirilən görüşdə iştirak edib. Mənbələr bu görüşün baş verdiyini təsdiqləsə də, məzmunu ilə bağlı əlavə detallar açıqlamayıb.
Siyasi karyeradan sonra qalmaqal
Bruno Le Maire 12 sentyabr 2024-cü ildə, yeddi il davam edən iqtisadiyyat naziri vəzifəsindən istefa verdiyini və siyasətdən getdiyini açıqlamışdı. O, bundan sonra İsveçrədə təhsil sahəsində fəaliyyət göstərməyi planlaşdırdığını bildirmişdi.
Lakin Epşteynlə bağlı ortaya çıxan yeni faktlar Le Mairenin siyasi keçmişinə kölgə salıb və Fransada ictimai müzakirələrə səbəb olub.
Epşteyn işi böyüyür
Analitiklər hesab edir ki, Epşteyn qalmaqalı artıq təkcə ABŞ-la məhdudlaşmır və Avropanın siyasi elitasına qədər uzanır. Yeni açıqlamalar Qərbdə uzun illər formalaşmış siyasi və maliyyə əlaqələrinin yenidən sorğulanmasına yol açır.
