Brüssel son illərin ən sərt etirazlarına səhnə oldu
Belçikanın paytaxtı Brüssel cümə axşamı son illərin ən gərgin və genişmiqyaslı etiraz aksiyalarından birini yaşayıb. Avropa İttifaqının Ortaq Kənd Təsərrüfatı Siyasətində planlaşdırılan dəyişikliklərə və Cənubi Amerika ölkələrini birləşdirən Mercosur bloku ilə imzalanması nəzərdə tutulan azad ticarət sazişinə qarşı minlərlə fermer paytaxta axışıb.
Təxminən 7 min fermer Avropa Parlamentinin qarşısında toplaşaraq kütləvi aksiya keçirib. Günorta saatlarında başlayan etirazlar əvvəlcə nisbətən sakit keçsə də, qısa müddət sonra vəziyyət nəzarətdən çıxıb və polis ilə nümayişçilər arasında şiddətli toqquşmalar yaşanıb.
Traktorlarla barrikadalar dağıdıldı
Sosial şəbəkələrdə yayılan görüntülərdə etirazçıların yandırdığı təkər və saman bağlamalarından qalxan qalın qara tüstünün Brüsselin müxtəlif rayonlarını bürüdüyü görünür. Fermerlər polis tərəfindən qurulan barrikadaları traktorlarla yararaq şəhərin əsas nəqliyyat arteriyalarını bağlayıb, paytaxtda gündəlik həyatı faktiki olaraq iflic vəziyyətinə salıblar.
Avropa Parlamenti binalarının yaxınlığında yerləşən bir sıra obyektlərin şüşələri sındırılıb. Etirazçılar təhlükəsizlik qüvvələrinə daş, kartof və müxtəlif əşyalar atıb. Buna cavab olaraq Belçika polisi yüksək təzyiqli su və gözyaşardıcı qazdan istifadə edib.
Polis müdaxiləsi və gərgin anlar
Qarşıdurmalar zamanı təhlükəsizlik qüvvələrinin sərt müdaxiləsi kameralara düşüb. Kadrlarda ən azı bir nümayişçinin yerə yıxılaraq polis tərəfindən zorakılığa məruz qaldığı açıq şəkildə görünür. Yerli hakimiyyət orqanları əvvəlcədən aksiyada məhdud sayda traktora icazə verildiyini, lakin günün ikinci yarısında minlərlə kənd təsərrüfatı texnikasının şəhərə daxil olduğunu açıqlayıb.
Axşam saatlarına doğru polis bölgədə nəzarəti qismən təmin etsə də, çoxlu sayda traktor və etirazçı Brüssel küçələrini tərk etməyib.
Mercosur sazişi narazılığın mərkəzindədir
Etirazların əsas səbəbi Avropa İttifaqı ilə Mercosur ölkələri arasında planlaşdırılan azad ticarət sazişidir. Belçika, Fransa və digər AB üzv ölkələrinin fermerləri bu razılaşmanın Cənubi Amerikadan daha ucuz kənd təsərrüfatı məhsullarının Avropa bazarına daxil olmasına şərait yaradacağını bildirir.
Fermerlərin fikrincə, avropalı istehsalçılar ciddi ekoloji və heyvan rifahı standartlarına əməl etməyə məcbur olduğu halda, Mercosur ölkələrindən idxal ediləcək məhsulların bu qaydalara tabe olmaması ədalətsiz rəqabət yaradacaq.
Avropa Komissiyası geri addım atdı
Artan ictimai təzyiq və zorakılıq hallarından sonra Avropa Komissiyasının sədri Ursula fon der Lyayen Mercosur sazişinin bu həftəsonu imzalanmayacağını və məsələnin gələn aya təxirə salındığını bəyan edib. Lakin saziş əleyhdarları bu qərarın yekun olmadığını, yalnız müvəqqəti “nəfəs alma” mərhələsi kimi qiymətləndirilməli olduğunu vurğulayır.
Eyni zamanda Brüsseldə keçirilən zirvə çərçivəsində Avropa İttifaqının dondurulmuş Rusiya aktivlərinə əl qoyulması ilə bağlı planlar da bəzi üzv ölkələrin etirazı səbəbindən gündəmdən çıxarılıb.
