İsrail Qərarlılıq Donanması fəallarını Negev həbsxanasında saxlayır
Fələstin Əsir Cəmiyyəti bəyan edib ki, İsrail hakimiyyəti “Qlobal Qərarlılıq Donanması” adlı beynəlxalq humanitar missiyanın fəallarını Fələstinli məhbuslara qarşı yüzlərlə cinayətin və ağır hüquq pozuntularının qeydə alındığı Negev həbsxanasında saxlayır.
Cəmiyyətin yazılı açıqlamasında vurğulanıb ki, Negev həbsxanası İsrailin ən böyük və ən çox pozuntu baş verən həbs müəssisələrindən biridir. Burada minlərlə fələstinli məhbus saxlanılır, o cümlədən Qəzzadan gətirilən çoxsaylı dustaqlar da bu həbsxanada yerləşdirilib.
İşgəncələr və ölüm halları sənədləşdirilib
Bəyanatda qeyd olunub ki, Negev həbsxanasında saxlanılan bəzi fələstinli məhbuslar İsrail qüvvələrinin ağır döyülməsi və işgəncələri nəticəsində həyatını itirib. Son illər bu müəssisədə baş verən fiziki zorakılıq, qəsdən tibbi laqeydlik və insanlıqdan kənar davranışlarla bağlı yüzlərlə hadisə sənədləşdirilib.
Fələstin Əsir Cəmiyyəti bildirib ki, İsrailin Negev və digər həbsxanalarında həyata keçirdiyi bu sistematik zorakılıqlar beynəlxalq insan haqları qanunlarını tam şəkildə pozur.
Ben-Qvirin paylaşdığı videolar qəzəb doğurdu
Açıqlamada İsrailin ifrat sağçı Milli Təhlükəsizlik naziri İtamar Ben-Qvirin paylaşdığı son videolara da reaksiya verilib. Cəmiyyətin məlumatına görə, həmin videolar Negev və ya digər həbsxanalarda çəkilib və Fələstinli məhbusların təhqir edilməsi, alçaldılması və hətta ölüm təhdidlərinə məruz qaldığını göstərir.
“Bu, Ben-Qvirin ilk dəfə belə bir davranış sərgiləməsi deyil. O, daha əvvəl də fələstinli məhbusları ən qorxunc şəkildə təqdim edən və onlara qarşı nifrət dolu çağırışlar edən görüntülər yayımlamışdı,” – deyə açıqlamada vurğulanır.
“İsrail həbsxanaları soyqırım mərkəzinə çevrilib”
Əsir Cəmiyyəti bəyan edib ki, İsrailin həbsxana sistemi artıq beynəlxalq hüququ tamamilə tapdalayaraq “soykırım sahələrinə” çevrilib. “İsrail həbsxanaları və düşərgələri son iki ildə həyata keçirilən sistematik cinayətlər nəticəsində müxtəlif formalarda soyqırım ocaqlarına dönüb. Bu gün azadlıqsevər fəalların başına gələnlər həmin siyasətin davamıdır,” – deyə bəyanatda qeyd olunub.
Cəmiyyət beynəlxalq təşkilatları, xüsusən də BMT-ni, Qırmızı Xaçı və insan haqları qurumlarını bu hadisələrə dərhal reaksiya verməyə və Negev həbsxanasındakı vəziyyətin araşdırılması üçün təcili missiya göndərməyə çağırıb.
