Barzanidən qəti təkzib
Nəçirvan Barzani iraqlı kürdlərin İrana hücum etdiyi barədə yayılan xəbərləri yalan adlandırıb.
O bildirib ki, “heç bir iraqlı kürd sərhədi keçməyib və bu barədə yayılan məlumatlar tamamilə əsassızdır”.
Regional hökumətdən açıqlama
İraq Kürdüstanı hökumət başçısının ofisinin müavini Əziz Əhməd də “X” platformasında paylaşım edərək iddiaları təkzib edib və sərhəd keçidi ilə bağlı xəbərləri “açıq yalan” adlandırıb.
Yerli mənbələr də təsdiqləmir
Bundan əvvəl yerli mənbələr ABŞ və sionist mediasında yayılan, kürd silahlı qruplarının İran ərazisinə doğru hərəkət etdiyi barədə xəbərləri təsdiqləməyib.
Tasnim News Agency agentliyi isə sərhədin İran tərəfində, xüsusilə İlam vilayəti boyunca tam təhlükəsizliyin təmin edildiyini yazıb.
SEPAH-dan sərt xəbərdarlıq
İran İslam İnqilabı Keşikçiləri Korpusu daha əvvəl İraq Kürdüstanında yerləşdiyi iddia olunan “inqilab əleyhinə qrupların” mövqelərinin vurulduğunu açıqlamışdı.
Bəyanatda İranın milli təhlükəsizliyinə qarşı istənilən addıma “qəti və sürətli cavab” veriləcəyi vurğulanmışdı.
Gərginlik davam edir
İddialar və qarşılıqlı bəyanatlar regionda artan hərbi və siyasi gərginlik fonunda səslənir. Hazırda sərhəd xəttində vəziyyətin sabit olduğu bildirilir.
