Əraqçi: “Bizə düşmən olanlarla diplomatik təmas mümkün deyil”
İran xarici işlər naziri Seyyid Abbas Əraqçi, Misirin Şarm əş-Şeyxdə keçiriləcək beynəlxalq zirvəsinə qatılmaqdan imtinanın səbəblərini açıqlayıb. Nazir bildirib ki, Tehran Misir prezidentinin dəvətini yüksək qiymətləndirir, lakin İrana qarşı sanksiya və təhdid siyasəti yürüdən ölkələrlə diplomatik əlaqə qurmaq mümkün deyil.
Əraqçi “X” sosial platformasında yazıb: “İran, Prezident Əbdülfəttah əs-Sisinin dəvətini minnətdarlıqla qarşılayır. Ancaq bizə düşmən mövqe tutanlarla eyni diplomatik masada əyləşmək qeyri-mümkündür.”
Qəzza soyqırımına qarşı qəti mövqe
İranlı nazir, İsrailin Qəzzada həyata keçirdiyi soyqırımı dayandıracaq və işğalçı qüvvələrin bölgədən çıxmasını təmin edəcək bütün təşəbbüsləri dəstəklədiklərini vurğulayıb:
“Fələstin xalqı öz müqəddəratını müəyyən etmək hüququna malikdir. Bu hüquq beynəlxalq legitimliyin təməlidir və bütün dövlətlər bu məsələdə daha ciddi mövqe nümayiş etdirməlidirlər.”
“İran bölgədə sülhün əsas dayağıdır”
Əraqçi qeyd edib ki, İran hər zaman bölgədə sülh və sabitliyin əsas qüvvəsi olub:
“Soyqırımçı İsrail rejimi sonsuz müharibələrin simvoluna çevrilib. İran isə daimi sülhün və ortaq rifahın tərəfdarıdır. Dirəniş cəbhəsi ilə birgə biz bölgədə ədalətli və davamlı sülhü inşa etməkdə qərarlıyıq.”
Əraqçinin bu bəyanatı, Tehranın Qəzza və Fələstin məsələsində prinsipial mövqeyini bir daha təsdiqləyib. İran tərəfi, İsrailin aqressiv siyasətinə qarşı çıxmaqla yanaşı, regionda ədalətə əsaslanan sülhün təmin olunması üçün bütün diplomatik təşəbbüsləri dəstəkləyir.
