İran ABŞ-a etimadsızlığını bir daha vurğuladı
İranın xarici işlər naziri Abbas Əraqçi ABŞ-la yaşanan əsas problemin bu ölkənin “hakimiyyətçi təbiəti” olduğunu deyib. O, bildirib ki, İran xalqı beynəlxalq təzyiqlər qarşısında geri addım atmayacaq və “ölkənin həqiqi nüvə bombası onun dözümlülüyü və mübarizə ruhudur”.
Əraqçinin sözlərinə görə, Tehran bütün çətinliklərə baxmayaraq, daxili güc və milli iradə ilə vəziyyəti idarə etməkdə qərarlıdır. Nazir qeyd edib ki, “İran xalqının hüquqlarından imtina edilməyəcək, lakin hər hansı məntiqli və ədalətli həll yoluna da açığıq.”
“Vaşinqtona etibar etmək mümkün deyil”
İran XİN rəhbəri, ABŞ-ın siyasətini “imperialist və zorlama yönümlü” adlandıraraq, “Vaşinqtonun vədlərinə və razılaşmalarına etibar etmək üçün heç bir əsas yoxdur,” – deyə əlavə edib. Əraqçi vurğulayıb ki, İran diplomatiyasında rasional yanaşma əsas prinsip olaraq qalır, lakin bu, ölkənin suverenliyinə xələl gətirməməlidir.
Ayətullah Xameneidən sərt mesaj: “Tramp xəyallar içində yaşayır”
Xatırladaq ki, bir neçə gün əvvəl İran İslam Respublikasının Ali Rəhbəri Ayətullah Seyid Əli Xamenei də ABŞ-ın keçmiş prezidenti Donald Trampın İranın nüvə sənayesinin guya məhv edildiyinə dair bəyanatlarına sərt reaksiya göstərmişdi.
Xamenei Trampa müraciətlə “Yaxşı, bu xülyada yaşa” deyərək, onun iddialarını “boş xəyallar” adlandırmışdı. O, həmçinin ABŞ-ı “terrorun əsl təcəssümü” kimi qiymətləndirib.
İranın mövqeyi dəyişmir
Ekspertlərin fikrincə, Əraqçinin bəyanatı Tehran rəhbərliyinin Vaşinqtona qarşı davamlı mövqeyini bir daha nümayiş etdirir. İran rəhbərliyi iqtisadi təzyiqlərə baxmayaraq, strateji istiqamətlərdə güzəştə getməyəcəyini açıq şəkildə bəyan edir.
İran diplomatik kanallar vasitəsilə dialoqa açıq olsa da, hər hansı danışıqların qarşılıqlı hörmət və bərabər hüquqlar prinsipi əsasında aparılmasını tələb edir.
