Əraqçi ABŞ və Avropanı tənqid etdi
İranın xarici işlər naziri Abbas Əraqçi İranla müharibədən sonra yaranan enerji böhranı fonunda ABŞ və Avropanı sərt tənqid edib.
O, sosial şəbəkədə paylaşım edərək bildirib ki, Vaşinqton əvvəllər Hindistanı Rusiyadan neft idxalını dayandırmağa məcbur etməyə çalışırdı.
Nazirin sözlərinə görə, müharibədən cəmi iki həftə sonra ABŞ indi ölkələrdən – o cümlədən Hindistandan – Rus neftini almağı xahiş edir.
“Vəziyyət acınacaqlıdır”
Əraqçi qeyd edib ki, Avropa ölkələri İranla müharibəni dəstəkləməklə ABŞ-dan Rusiyaya qarşı daha güclü dəstək alacaqlarını düşünürdülər.
Onun sözlərinə görə, hazırda yaranmış vəziyyət “həqiqətən acınacaqlı” görünür.
İranlı diplomat paylaşımında beynəlxalq mediada yayımlanan məlumatlara da istinad edib.
Rusiyanın neft gəlirləri artır
Beynəlxalq media Rusiyanın neft gəlirlərinin artdığını bildirir.
Məlumatlara görə, neft qiymətlərinin yüksəlməsi nəticəsində Moskva gündəlik təxminən 150 milyon dollar əlavə gəlir əldə edir.
Bu artım qlobal enerji bazarlarında gərginliyin artması ilə əlaqələndirilir.
ABŞ Rus nefti ilə bağlı qərar verdi
ABŞ hökuməti Rusiyaya qarşı sanksiyalar fonunda müəyyən istisnalar tətbiq edib.
ABŞ Maliyyə Nazirliyinin məlumatına görə, Rusiyadan dəniz yolu ilə daşınan və artıq yüklənmiş neftin satışına müvəqqəti icazə verilib.
Bu icazə 11 aprel tarixinə qədər qüvvədə olacaq.
Enerji bazarlarında gərginlik
ABŞ administrasiyası həmçinin enerji bazarındakı qiymət artımını azaltmaq üçün strateji neft ehtiyatlarından 172 milyon barel neft buraxıldığını açıqlayıb.
Buna baxmayaraq, qlobal bazarda neft qiymətləri yüksəlməkdə davam edir və bəzi hallarda bir barel üçün 100 dollar həddini keçib.
Analitiklər hesab edir ki, regiondakı müharibə və xüsusilə Fars körfəzindəki gərginlik enerji bazarına ciddi təsir göstərir.
