Rəsmi təyinat açıqlandı
İranda Məsləhət Şurasının sözçüsü Ayətullah Əli Rza Ərafi keçid mərhələsi üçün formalaşdırılan Rəhbərlik Şurasına üzv seçildiyini elan edib.
Bundan əvvəl İranın Ali Milli Təhlükəsizlik Şurasının katibi Əli Laricani bildirmişdi ki, yeni lider seçilənədək ali rəhbərin səlahiyyətlərini icra etmək üçün Rəhbərlik Şurası yaradılıb və konstitusion prosedurlar normal qaydada davam edir.
Keçid mexanizmi necə işləyəcək?
Müvəqqəti idarəetmə
Məlumata görə, Şeyx Əli Rza Ərafi prezident və məhkəmə hakimiyyətinin rəhbəri ilə birlikdə ali rəhbərin səlahiyyətlərini müvəqqəti olaraq icra edəcək heyətin tərkibində yer alacaq.
Bu mexanizm ölkə Konstitusiyasına uyğun olaraq tətbiq olunur və yeni ali rəhbərin seçilməsinədək qüvvədə qalacaq.
Hadisələrin fonu
İran dövlət televiziyası ABŞ-İsrail hücumu nəticəsində Ali rəhbər Seyid Əli Xameneinin şəhid olduğunu elan etmişdi. Bundan sonra ölkədə keçid mexanizminin işə salındığı bildirilib.
Ayətullah Əli Rza Ərafi kimdir?
Ayətullah Əli Rza Ərəfi 1959-cu ildə İranın Meybod şəhərində anadan olub. O, Qum dini hövzəsində mühüm dini və tədris fəaliyyətləri ilə tanınır.
Ərafi Rəhbərliyi Seçən Ekspertlər Məclisinin üzvüdür və 2024-cü ildə bu qurumun sədrinin ikinci müavini seçilib. Həmin məclis ali rəhbərin seçilməsi və zəruri hallarda vəzifədən kənarlaşdırılması səlahiyyətinə malik konstitusion orqandır.
O, həmçinin Konstitusiyanın Qəyyumlar Şurasında və digər dini-administrativ qurumlarda fəaliyyət göstərir və İranın dini-siyasi elitasında təsirli fiqurlardan biri hesab olunur.
Yeni mərhələ
Analitiklər bildirirlər ki, keçid Rəhbərlik Şurasının formalaşdırılması ölkədə idarəetmənin fasiləsiz davam etdirilməsi məqsədi daşıyır. Yeni ali rəhbərin seçilməsi prosesi isə Ekspertlər Məclisinin qərarı ilə həyata keçiriləcək.
Hazırda Tehran siyasi və təhlükəsizlik baxımından həssas mərhələdən keçir və proseslərin konstitusion çərçivədə davam etdiyi vurğulanır.
