Birgə bəyanat Ammanda yayımlandı
Bir sıra ərəb və İslam ölkələrinin xarici işlər nazirlikləri, eləcə də regional təşkilatlar 22 fevral 2026-cı il tarixində Amman şəhərində qəbul edilən birgə bəyanatla ABŞ-ın İsraildəki səfirinin açıqlamalarını kəskin şəkildə pisləyiblər.
Sənəddə səfirin İsrailin ərəb ölkələrinə məxsus torpaqlar, o cümlədən işğal altındakı İordan çayının qərb sahili üzərində nəzarətini qəbul edən fikirlərinin beynəlxalq hüquq prinsiplərinə və BMT Nizamnaməsinə zidd olduğu bildirilib. Qeyd olunub ki, bu cür bəyanatlar regionun təhlükəsizliyi və sabitliyi üçün ciddi təhdid yaradır.
Torpaqlar üzərində suverenlik iddialarına etiraz
Bəyanatı imzalayan ölkələr sırasında İordaniya, Birləşmiş Ərəb Əmirlikləri, İndoneziya, Pakistan, Bəhreyn, Türkiyə, Səudiyyə Ərəbistanı, Suriya, Oman, Fələstin, Qətər, Küveyt, Livan və Misir yer alıb.
Eyni zamanda, İslam Əməkdaşlıq Təşkilatı, Ərəb Dövlətləri Liqası və Körfəz Əməkdaşlıq Şurası da bəyanata qoşulub.
Tərəflər vurğulayıblar ki, işğal olunmuş Fələstin torpaqları və digər ərəb əraziləri üzərində İsrailin heç bir suverenliyi yoxdur. İordan çayının qərb sahilinin ilhaqı və ya Qəzza zolağından ayrılması istiqamətində atılan addımlar qəti şəkildə rədd edilib.
Sülh perspektivinə təhlükə xəbərdarlığı
Birgə sənəddə bildirilib ki, bu cür açıqlamalar ABŞ Prezidenti Donald Trump tərəfindən irəli sürülən və Qəzzada münaqişənin sona çatdırılmasına yönəlmiş təşəbbüslərlə ziddiyyət təşkil edir. Qeyd olunub ki, regionda gərginliyin azaldılması və Fələstin xalqının müstəqil dövlət qurması üçün siyasi perspektivin yaradılması əsas prioritet olmalıdır.
Bəyanatda əlavə edilib ki, genişlənmə siyasətinin və qeyri-qanuni addımların davamı daha çox zorakılığa və qarşıdurmaya səbəb olacaq, sülh imkanlarını zəiflədəcək.
“Ənsarullah”dan əlavə reaksiya
Bu arada, Ənsarullah hərəkatının siyasi bürosu da açıqlama yayaraq ABŞ-ın İsraildəki səfiri Mike Huckabeenin fikirlərini sionist genişlənmə planlarına açıq dəstək kimi qiymətləndirib.
Hərəkat bildirib ki, İsrailin Fərat çayından Nil çayına qədər uzanan ərazilər üzərində “tarixi hüquq” iddiaları region ölkələri üçün ciddi təhlükədir və ərəb dövlətləri bu çağırışlara qarşı birgə və məsuliyyətli mövqe nümayiş etdirməlidir.
