Epşteyn dosyalarında şokedici yazışmalar
ABŞ-da azyaşlı qızlara qarşı cinsi istismar və fahişəlik şəbəkəsi qurmaqda ittiham olunarkən həbsxanada ölü tapılan milyarder Ceffri Epşteyn ilə bağlı yayımlanan yeni sənədlər ictimaiyyətdə böyük rezonans doğurub. Açıqlanan materiallarda tanınmış tanıtımçı Peggi Siqalın Epşteynə göndərdiyi elektron məktubda “körpə gətirmək” təklifindən bəhs etdiyi üzə çıxıb.
ABŞ Ədliyyə Nazirliyindən milyonlarla yeni sənəd
ABŞ Ədliyyə Nazirinin müavini Todd Blanş Epşteyn işi ilə bağlı 3 milyondan çox yeni sənədin ictimaiyyətə təqdim edildiyini açıqlayıb. Bu sənədlər arasında elektron məktublar, fotoşəkillər və müxtəlif yazışmalar yer alır.
Məhz bu dosyalar Epşteynin ətrafındakı əlaqələr şəbəkəsinin miqyasını və bəzi tanınmış şəxslərin adlarının necə hallandırıldığını bir daha gündəmə gətirib.
“Sənə bir-iki balaca körpə gətirə bilərəm”
Sənədlərdə yer alan elektron məktublardan birində Peggi Siqalın Epşteynə Keniyanın paytaxtı Nayrobiya səfərə hazırlaşdığını yazdığı görülür. Məktubda o, səfər zamanı başlarına gələ biləcək “təhlükələri” ironik şəkildə ifadə edir və belə yazır:
“Sənə başqa bir həyat təcrübəsi yaşatdığın üçün nə qədər təşəkkür etsək azdır. Maasai döyüşçüləri bizi yeməsə, somalili quldurlar yeyəcək”.
Ən çox diqqət çəkən hissə isə məktubun davamında yer alır. Siqal Epşteynə belə yazır:
“Sənin üçün bir və ya iki balaca körpə gətirə bilərəm. Qız yoxsa oğlan? Tam Madonna kimi”.
Bu ifadə sənədlərin açıqlanmasından sonra ABŞ mediasında və sosial şəbəkələrdə ciddi reaksiyalara səbəb olub.
Ratner–Epşteyn fotoları da dosyalarda yer aldı
Yeni açıqlanan sənədlər arasında ABŞ prezidenti Donald Trampın həyat yoldaşı Melaniya Tramp haqqında çəkilmiş sənədli filmin rejissoru Brett Ratnerın Epşteynlə birlikdə göründüyü fotoşəkillər də var.
Fotolarda Ratnerin Epşteyn və kimliyi açıqlanmayan iki qadınla birlikdə divanda oturduğu və bir-birinə yaxın olduğu görünür. Bu görüntülərin hansı tarixdə çəkildiyi barədə isə sənədlərdə konkret məlumat verilməyib.
Susqunluq davam edir
Həm Peggi Siqal, həm də Brett Ratner yayımlanan sənədlər və ittiham xarakterli məlumatlarla bağlı indiyədək heç bir açıqlama verməyib. Bu susqunluq isə Epşteyn işi ətrafında yeni sualların yaranmasına səbəb olub.
Epşteyn qalmaqalı yenidən gündəmdə
Analitiklərin fikrincə, açıqlanan yeni sənədlər Epşteyn dosyasının hələ də tam bağlanmadığını və gələcəkdə daha çox tanınmış adın gündəmə gələ biləcəyini göstərir. ABŞ cəmiyyətində isə bu iş, elit dairələrdə illərlə davam etdiyi iddia olunan cinsi istismar şəbəkələrinin necə gizlədildiyi ilə bağlı müzakirələri yenidən alovlandırıb.
