ABŞ Ədliyyə Nazirliyinə qarşı ciddi ittihamlar
ABŞ Ədliyyə Nazirliyinin ictimaiyyətdə “Epşteyn dosyaları” kimi tanınan sənədlərlə bağlı qanuni öhdəliklərini böyük ölçüdə yerinə yetirmədiyi məlum olub. ABŞ mediasının məhkəmə sənədlərinə istinadən yaydığı xəbərlərə görə, nazirlik indiyədək Ceffri Epşteynə aid sənədlərin cəmi 1 faizindən azını ictimaiyyətə təqdim edib.
Məlumata əsasən, Epşteyn dosyaları çərçivəsində yalnız 12 min 285 sənəd, ümumilikdə 125 min 575 səhifə açıqlanıb. Halbuki federal qanunvericiliyə görə, bu sənədlərin böyük hissəsi ən geci 19 dekabr tarixinədək dərc edilməli idi.
Nazirlik: proses ləng gedir
ABŞ-ın ədliyyə naziri Pam Bondi Nyu-Yorkun Cənub Dairəsi üzrə federal hakimi Pol Engelmayyerə ünvanladığı beş səhifəlik məktubunda sənədlərin açıqlanmasının gecikməsinin əsas səbəbi kimi Epşteynin qurbanlarının kimliklərinin qorunmasını göstərib.
Bondinin sözlərinə görə, Epşteyn işi ilə bağlı iki milyondan çox sənəd hazırda araşdırma mərhələsindədir. Nazirlik bu prosesin son dərəcə mürəkkəb olduğunu və ciddi insan resursu tələb etdiyini bildirir.
Yüzlərlə mütəxəssis cəlb olunub
Ədliyyə Nazirliyinin açıqlamasında qeyd olunur ki, dosyaların araşdırılması üçün təxminən 500 mütəxəssis prosesə cəlb edilib. Nazirlik sənədlərin açıqlanmasının vaxt və resurs baxımından çətin olduğunu əsas gətirsə də, Demokratlar bu izahatları qaneedici hesab etmir.
ABŞ Senatında azlığın lideri Çak Şumer bildirib ki, Ədliyyə Nazirliyi hələ də Konqresə təqdim etməli olduğu, dosyalarda adı keçən dövlət məmurları və “siyasi baxımdan nüfuzlu şəxslər”lə bağlı redaktə olunmamış siyahını təqdim etməyib.
Tramp administrasiyasına təzyiq artır
Şumer Tramp administrasiyasını hədəf alaraq deyib: “Ədliyyə Nazirliyi artıq 17 gündür qanunu pozur. Sənədlər bilərəkdən gecikdirilir və ictimaiyyətdən gizlədilir”. Onun sözlərinə görə, indiyədək yayımlanan sənədlərin əksəriyyəti ciddi şəkildə qaraldılıb və əhəmiyyətli yeni məlumatlar ortaya qoyulmayıb.
Şumer vurğulayıb ki, nə Epşteynin mümkün 10 əsas cinayət ortağına dair yeni faktlar, nə də “dönüş nöqtəsi” sayıla biləcək sənədlər açıqlanıb.
Yeni ifşalar gözləntisi puç olub
İndiyədək dərc edilən sənədlər Epşteynin fəaliyyəti və onun keçmiş sevgilisi, eyni zamanda cinayət ortağı olan Ghislayn Maksvel ilə qurduğu şəbəkə barədə məhdud məlumat verir. Lakin bu materiallar yeni sensasiyalar ortaya çıxarmayıb.
Xatırladaq ki, Ghislayn Maksvel yetkinlik yaşına çatmayanlara qarşı cinsi istismar cinayətlərinə görə 20 il həbs cəzasına məhkum edilib. Epşteynin qurbanlarından Marina Laserda isə daha əvvəl verdiyi açıqlamada Britaniya kral ailəsinin üzvü Endryu Mauntbatten-Uindsorun ABŞ-da mühakimə olunmasını tələb edib. Mauntbatten-Uindsor isə ona qarşı irəli sürülən ittihamları rədd edib.
