Epstein məktublarında Barrack adı ön plana çıxır
ABŞ Demokrat Partiyasına yaxın dairələrin üzə çıxardığı yeni sənədlər Jeffrey Epstein qalmaqalını yenidən alovlandırıb. Azyaşlı qızların cinsi istismarı məqsədilə gizli şəbəkə qurmaqda ittiham olunan və məhkəmə prosesi davam edərkən həbsxanada müəmmalı şəkildə ölən milyarderin elektron məktublarında bu dəfə ABŞ-ın Ankaradakı keçmiş səfiri və Suriya üzrə xüsusi nümayəndəsi Tom Barrack-ın adı keçir.
Ortaya çıxan yazışmalar Epstein ilə Barrack arasında sadəcə rəsmi təmaslarla məhdudlaşmayan, illərlə davam etmiş səmimi münasibətin mövcud olduğunu göstərir. Xüsusilə bir məktubda Epstein-in Barrack-a “Uşaqla birlikdə şəkilini göndər, məni güldür” yazması ictimaiyyətdə ciddi narahatlıq doğurub və bu ifadələrin hansı məna daşıdığı barədə suallar artıb.
Trump və Clinton barədə pərdəarxası suallar
Məktublardan birində Epstein yazır ki, uzun müddət həm Donald Trump, həm də Bill Clinton barədə jurnalistlərdən saysız-hesabsız suallar alıb. Onun sözlərinə görə, bu mövzuda danışmamağa çalışıb, çox vaxt “Söyləyəcəyim bir şey yoxdur” cavabı ilə kifayətlənib və ya sualları tamamilə görməzdən gəlib. Epstein etiraf edir ki, küçədə də bir neçə dəfə gözlənilmədən bu mövzuda suallar verilib və o, artıq daha ehtiyatlı davranmağa çalışır.
Tom Barrack-ın cavabı isə çox qısa olur: “Ümid edirəm yaxşısan, görüşək.” Ardınca Epstein-in ondan “Uşaqla birlikdə şəkilini göndər” istəməsi məhz bu yazışma blokunu ictimai müzakirənin mərkəzinə çıxarıb. Barrack-ın həmin məktublara dair bu günə qədər hər hansı rəsmi açıqlama verməməsi sualları daha da artırır.
“Gecə həyatının üç silahdarı”
Jurnalist və yazıçı Michael Wolff “Atəş ve Qəzəb” adlı kitabında Epstein, Trump və Barrack arasında uzun illər davam edən əlaqələrə geniş yer verir. Wolff-un təsvirinə görə, bu üçlük 1980 və 1990-cı illərin Nyu-York gecə həyatında tez-tez birlikdə görünür, əyləncə məkanlarında ayrı-seçilməz sayılırdı. Müəllif iddia edir ki, illər ötdükcə Epstein imicinə zərər gəlməməsi üçün Trump-dan məsafə saxlamaya başlayıb, lakin Barrack-la yaxınlığını davam etdirib.
Trump-la bağlı ağır iddialar
Yeni açıqlanan materiallar arasında Epstein-in 2011-ci ildə Ghislaine Maxwell-ə göndərdiyi bir elektron məktub da yer alır. Həmin yazışmada o, Donald Trump-ın öz evində adı gizli saxlanılan zərərçəkənlərdən biri ilə “saatlarla vaxt keçirdiyini” iddia edir. Bu cümlə, artıq mövcud olan şübhələri daha da dərinləşdirən məqam kimi qiymətləndirilir.
Epstein-in 2019-cu ildə Michael Wolff-a ünvanladığı başqa bir məktubda isə daha açıq ifadələr var. O, Trump haqqında “Təbii ki, qızlardan xəbəri vardı, çünki Ghislaine-dən bunu dayandırmasını xahiş etmişdi” sözlərini işlədir. Bu iddia, Trampın baş verənlərdən xəbərsiz olduğunu iddia edən müdafiə arqumentlərini ciddi şəkildə sual altına qoyur.
Siyasi dairələrdə artan təzyiq
Epstein işinə dair bu cür yazışmaların üzə çıxması həm hüquqi baxımdan, həm də siyasi planda ABŞ elitasına təzyiqi artırır. Tom Barrack-ın adının çəkilməsi, onun uzun illər həm Respublikaçılara, həm də biznes dairələrinə yaxın fiqur olması səbəbindən ayrıca diqqət çəkir. Barrack-ın bu məktublara susqun qalması, yeni ifadələrin və ya araşdırma tələblərinin gündəmə gələcəyinə dair gözləntiləri gücləndirir.
Müşahidəçilər hesab edirlər ki, Epstein qalmaqalının tam olaraq bağlanması üçün təkcə hüquqi proseslər deyil, həm də bu cür məktub və yazışmaların bütövlükdə ictimaiyyətə açıqlanması vacibdir. Hələlik isə nə Barrack, nə Trump, nə də adı hallanan digər yüksək vəzifəli şəxslər bu son sənədlər barədə geniş şərh vermək istəmir.
