Fələstin hərəkatları: Livanla tam həmrəyik
Fələstin HƏMAS Hərəkatı İsrailin Livanın cənub bölgələrinə qarşı həyata keçirdiyi hərbi əməliyyatları “cinayətkar təcavüz” adlandıraraq, onu sərt şəkildə qınayıb. HƏMAS-ın cümə axşamı yaydığı bəyanatda bildirilir ki, İsrailin hücumları dinc sakinləri hədəf alır və beynəlxalq hüququ açıq şəkildə pozur.
HƏMAS Livan dövləti, xalqı və müqaviməti ilə tam həmrəyliyini ifadə edib. Bəyanatda BMT-yə, eləcə də ərəb və müsəlman ölkələrinə müraciət edilərək, “İsrailin təcavüzünü dayandırmaq və işğalçı rəhbərləri məsuliyyətə cəlb etmək üçün təcili addımlar atmaq” çağırışı edilib.
İslami Cihad: Livanın suverenliyinə hücum qəbulolunmazdır
İslami Cihad Hərəkatı da İsrailin Livan ərazisinə qarşı artan hərbi hücumlarını “Livanın suverenliyinə və beynəlxalq hüquqa açıq təcavüz” kimi qiymətləndirib.
Hərəkat bəyan edib ki, “biz bütün qətiyyətimizlə Livan, onun xalqı və müqaviməti ilə bir yerdəyik. Livan xalqının öz torpağını və suverenliyini qorumaq üçün bütün mövcud vasitələrdən istifadə etmək haqqı var.”
Xalq Cəbhəsi: Müqavimətin haqqı danılmazdır
Fələstinin Xalq Cəbhəsi də İsrailin Livana qarşı artan hücumlarını “sionist təxribat” adlandıraraq, müqavimətin bu təcavüzü dəf etmək haqqının danılmaz olduğunu bildirib. Cəbhə bəyan edib ki, “işğalın qarşısını almağın yeganə yolu birgə müqavimət və region xalqlarının həmrəyliyidir.”
Ənsarullah: Livan hökumətinin susqunluğu İsrailin cəsarətini artırıb
Yəməndəki Ənsarullah Hərəkatının siyasi bürosu İsrailin Livana qarşı son hərbi eskalasiyasını kəskin tənqid edib. Bəyanatda qeyd olunub ki, Livan hökumətinin əvvəlki hücumlara qarşı passiv mövqeyi İsrailin daha da cəsarətlənməsinə şərait yaradıb.
Hərəkat bəyan edib: “Yəmən hökuməti və xalqı Livan, onun ordusu və İslam müqaviməti ilə tam həmrəydir. İsrailin hərbi təcavüzünə qarşı durmaq həm dini, həm də insani baxımdan qanuni bir haqqdır.”
Ənsarullah həmçinin beynəlxalq ictimaiyyəti və ərəb ölkələrini “Livanla real həmrəylik nümayiş etdirməyə və İsrailin hücumlarını dayandırmaq üçün əməli addımlar atmağa” çağırıb.
İsrailin hücumları davam edir
Bu arada, İsrail ordusu gün ərzində Livanın cənubundakı bir sıra yaşayış məntəqələrinə — Teybə, İta əl-Cəbel, Teyr Dibə, Zutər əş-Şərqiyyə və Kfərduninə hava zərbələri endirib. Hücumdan əvvəl isə Tura qəsəbəsi hədəfə alınmış, nəticədə bir nəfər şəhid olmuş, üç nəfər yaralanmışdı.
Analitiklər bildirirlər ki, Livana qarşı davam edən bu hücumlar regionda genişmiqyaslı qarşıdurma riskini daha da artırır.
