Ənsarullah: Yəmən öz maraqlarını qorumaqda tərəddüd etməyəcək
BMT Təhlükəsizlik Şurasının Yəmənə tətbiq olunan maliyyə və səyahət məhdudiyyətlərini daha bir il müddətinə uzatması Sənada ciddi narazılıqla qarşılanıb. Hərəkatın siyasi bürosunun üzvü Məhəmməd əl-Fərəh bildirib ki, Yəmən xalqının maraqlarına qarşı atılan hər bir təhdidə eyni səviyyədə cavab veriləcək. Onun sözlərinə görə, yəmənlilər öz hüquqlarını, dinlərini və ləyaqətlərini qorumaq üçün bütün qanuni vasitələrdən istifadə etməkdə qərarlıdırlar.
“Təhlükəsizlik Şurası ikili standartlara sadiqdir”
Məhəmməd əl-Fərəh “X” platformasında yaydığı açıqlamada Təhlükəsizlik Şurasını “dünyanın ən pis ikili standart nümunəsi” adlandırıb. O qeyd edib ki, Şura Qəzzada baş verən kütləvi qırğınlara illərlə göz yumub, hətta İsrailin hərbi əməliyyatlarına siyasi himayə göstərib. Onun sözlərinə görə, eyni qurum Yəmənə qarşı tətbiq etdiyi sanksiyaları heç bir hüquqi və mənəvi əsas olmadan davam etdirir.
Əl-Fərəh həmçinin bildirib ki, Qəzza iki ildir davam edən blokada və bombardman altında məhv edilir, Yəmən isə on ildir mühasirə şəraitində yaşayır. O, Təhlükəsizlik Şurasının qərarlarını “Qərb maraqlarının bölüşdürüldüyü platforma” kimi xarakterizə edib və insan hüquqlarının yalnız Qərb ölkələrinin maraqları çərçivəsində dəyərləndirildiyini vurğulayıb.
“Bəzi beynəlxalq təşkilatlar Yəməndə İsrailə casusluq edir”
Ənsarullah rəsmisi bəzi beynəlxalq qurumların humanitar yardım adı altında casusluq fəaliyyəti apardığını da iddia edib. Onun sözlərinə görə, bu vəziyyət BMT institutlarının “sionist təsir dairəsinə alındığının” bariz nümunəsidir və Yəməndə fəaliyyət göstərən bəzi strukturların mandat xaricinə çıxdığını sübut edir.
Rusiya və Çinin mövqeyi: “qismən tarazlıq”
Əl-Fərəh, bununla yanaşı, Rusiya və Çinin sanksiyaların yenilənməsi prosesində səsvermədən imtina etməsini “insani və əxlaqi mövqenin təzahürü” kimi qiymətləndirib. O, bu addımı ABŞ-ın sanksiyalar vasitəsilə xalqları təzyiq altına alma siyasətinə qarşı mesaj kimi səciyyələndirib. Lakin o etiraf edib ki, Moskva və Pekinin qərara tam şəkildə veto qoyması Yəmən üçün daha güclü siyasi dəstək olardı.
Sanksiyaların mahiyyəti
Təhlükəsizlik Şurasının qəbul etdiyi qərara əsasən, maliyyə sanksiyaları və səyahət qadağası 14 noyabr 2026-cı ilədək uzadılır. Həmçinin Yəmən üzrə ekspert qrupunun mandatı 15 dekabr 2026-cı ilə qədər artırılıb. Bu qərar 2014-cü ildə qəbul olunan 2140 və 2015-ci il 2216 saylı qətnamələrin müddətini uzadır və ABŞ-ın təşəbbüsü ilə həyata keçirilir.
Qəzzaya dəstək yenidən təsdiqləndi
Məhəmməd əl-Fərəh çıxışının sonunda Yəmənin Qəzzaya və “ümumilikdə zülmə məruz qalan xalqlara” dəstəyinin dəyişməz olduğunu vurğulayıb. Onun fikrincə, Yəmənə qarşı sanksiyalar bu mövqeni cəzalandırmaq və ölkəni siyasi təslimçiliyə məcbur etmək məqsədi daşıyır.
Hərəkat bildirir ki, Yəmən regiondakı hegemonluq siyasətinə qarşı dayanmaqda davam edəcək və Qəzza ilə həmrəyliyini heç bir təzyiq qarşısında geri çəkməyəcək.
