Əli Kərimlinin saxlanılması ilə bağlı məlumatlar yayılıb
Azərbaycan Xalq Cəbhəsi Partiyasının (AXCP) sədri Əli Kərimlinin saxlanıldığı və evində Dövlət Təhlükəsizlik Xidmətinin (DTX) əməkdaşları tərəfindən axtarış aparıldığı bildirilir. Bu barədə məlumatı partiya üzvləri sosial şəbəkələr vasitəsilə yayıblar. Rəsmi qurumlar—DTX və Daxili İşlər Nazirliyi—hələlik hadisə ilə bağlı heç bir açıqlama verməyiblər.
Partiyanın məlumatına görə, Əli Kərimlinin saxlanılması üçün hansısa rəsmi əsas göstərilməyib və axtarış zamanı ailə üzvlərinə də məlumat verilməyib.
Saleh Rüstəmov da saxlanılıb
Həmçinin, 2019-cu ildə AXCP sədri Əli Kərimliyə maddi yardım göstərmək ittihamı ilə 7 il 3 ay müddətinə həbs edilən, daha sonra prezidentin əfv sərəncamı ilə azadlığa buraxılan Saleh Rüstəmovun da DTX əməkdaşları tərəfindən saxlanıldığı bildirilir. Bu barədə məlumatı onun oğlu Sezgin Rüstəmov “Facebook”da paylaşıb.
Saleh Rüstəmov – əvvəllər Gədəbəy Rayon İcra Hakimiyyətinin başçısı – 2019-cu ildə Rusiyada qanunsuz sahibkarlıq və vəsaitlərin AXCP-ni maliyyələşdirməyə yönəldilməsi ittihamı ilə həbs olunmuşdu. O, 2022-ci ilin mayında əfv edilərək azadlığa çıxmışdı və hazırda Rusiya vətəndaşıdır. Azərbaycanacan isə 2025-ci il noyabrın 19-da bacısı qızının yas mərasiminə görə gəldiyi bildirilir. Ölkədən geri dönmək istərkən ona çıxış qadağası qoyulduğu məlum olub.
AXCP: “Saxlanılmalar siyasi motivlidir”
AXCP rəsmi açıqlama yayaraq Əli Kərimlinin saxlanılmasını “tamamilə siyasi motivli” adlandırıb. Partiyanın bəyanatında vurğulanır ki, son illər hakimiyyət Əli Kərimliyə qarşı müxtəlif məhdudiyyətlər tətbiq edib və onun beynəlxalq media ilə əlaqələri, qlobal siyasi platformalarda iştirakı hökuməti narahat edib.
Bəyanatda daha sonra deyilir:
“Bugünkü saxlanılma ölkədə siyasi fəaliyyəti və vətəndaş azadlıqlarını boğmaq cəhdidir. Bu addım müstəqil siyasi qüvvəni sıradan çıxarmaq məqsədi daşıyır.”
Partiya həmçinin Əli Kərimlinin, Məmməd İbrahimin və saxlanılan digər üzvlərin dərhal azad edilməsini tələb edib və beynəlxalq ictimaiyyəti reaksiyaya çağırıb.
AXCP-nin digər üzvləri də saxlanılıb
Məlumatlara görə, AXCP Rəyasət Heyətinin üzvü Məmməd İbrahim də polis tərəfindən saxlanılıb və onun evində axtarış aparılır. Bu barədə məlumatı oğlu Turan İbrahim verib. Həmçinin partiya sədrinin köməkçisi Faiq Əmirlinin, sədr müavini Seymur Həzinin verdiyi məlumata əsasən Əli Kərimlinin könüllü sürücüsü Ruslan Əmirli, Sabunçu rayon təşkilatının sədri Fariz Əlizadə də saxlanılanlar arasındadır.
Hazırda partiyanın 20-dən çox üzvünün müxtəlif ittihamlarla həbsdə olduğu bildirilir.
Hadisə yerinə yaxınlaşmağa imkan verilmir
AXCP sədr müavini Seymur Həzi Meydan TV-yə açıqlamasında bildirib ki, hazırda Əli Kərimlinin evinin yaxınlığındadır, lakin əraziyə buraxılmırlar:
“Əli Kərimlinin evinə yaxınlaşmaq mümkün deyil. Çox sayda mülki geyimli şəxslər var və yaxınlaşanları əraziyə buraxmırlar. Əli bəylə əlaqə qurmaq və məlumat almaq da mümkün deyil.”
Hökumətə yaxın media iddia edir ki, Əli Kərimlinin evində axtarış Prezident Administrasiyasının sabiq rəhbəri Ramiz Mehdiyevin cinayət işi çərçivəsində aparılır. Mehdiyev haqqında oktyabrın 14-də “dövlətə xəyanət” və “hakimiyyəti zorla ələ keçirmə” ittihamları ilə 4 aylıq ev dustaqlığı qətimkan tədbiri seçilmişdi.
