Yəməndə 30 noyabr yürüşü: Husi Fələstin və Livana dəstək mesajı verdi
Ənsurullah Hərəkatının lideri Əbdülməlik Husi 30 noyabr – Cəlil Günü münasibətilə Yəmən xalqına müraciət edərək sabah SənanınSəbeyn Meydanında milyonluq yürüş keçirməyə çağırıb. O, şənbə günü yayımladığı bəyanatda bu günün Yəmən tarixində xüsusi yeri olduğunu vurğulayaraq, 128 il davam edən Britaniya işğalının başa çatmasını xatırladıb və xalqı münasibətlə təbrik edib.
“Yəmən Fələstin və Livanı tək qoymayacaq”
Əbdülməlik Husi bildirib ki, sabah keçiriləcək genişmiqyaslı yürüş həm də Yəmən xalqının müsəlman ümmətinə sədaqətini nümayiş etdirmək məqsədi daşıyır. Onun sözlərinə görə, Yəmən heç vaxt Fələstin və Livan xalqını “sionist düşmənin caynağı altında tək buraxmayacaq” və öz mənəvi-siyasi mövqeyindən geri çəkilməyəcək.
Husi əlavə edib ki, “xalqımız mövqeyində sabitdir, haqq yolundan dönmür və mübarizədən çəkilmir”.
İsrailin hücumları və qərb ölkələrinin rolu
Ənsurullah lideri hazırkı mərhələdə bölgədə baş verənlərə toxunaraq İsrailin ABŞ və Böyük Britaniyanın iştirakı ilə həyata keçirdiyi hücumları “qərbin istismarçı və müstəmləkəçi siyasətinin davamı” adlandırıb. O, İsrailin həm Fələstində, həm də Livanda cinayətlərini davam etdirdiyini, atəşkəs razılaşmalarını isə açıq şəkildə pozduğunu bildirib.
Husi vurğulayıb ki, “düşmən qüvvələri yeni hücumlara hazırlaşır” və bu səbəbdən bölgə xalqlarının ayıq olması, bütün vasitələrlə müdafiəyə hazır durması vacibdir. Onun fikrincə, düşmənin planlarına qarşı həssaslıq və hazırlıq “iman məsuliyyətinin ayrılmaz hissəsidir”.
Yəməndə hərbi və təhlükəsizlik hazırlığı davam edir
Əbdülməlik Husi həmçinin Yəməndə hərbi hazırlığın və təhlükəsizlik sahəsində əldə edilən nailiyyətlərin davam etdiyini qeyd edib. O bildirib ki, xalqın ayıqlığı, daimi hazırlıq vəziyyəti və səfərbərlik ruhu ölkənin strateji mövqeyinin formalaşmasında mühüm rol oynayır.
Husi bəyanatının sonunda Yəmən xalqını sabah Səbeyn Meydanında bir araya gələrək həm Cəlil Gününün tarixi əhəmiyyətini yad etməyə, həm də Fələstin və Livana dəstək mesajını dünyaya çatdırmağa çağırıb.
