Danışıqlar iddiası təkzib edildi
“Dropsite News” saytı ABŞ ilə Kuba arasında yüksək səviyyəli danışıqların aparılması barədə səsləndirilən iddiaları rədd edib. Nəşr ABŞ Prezidenti Donald Trampın belə məlumatı Dövlət katibi Marko Rubiodan aldığını bildirməsinə baxmayaraq, bu iddianın həqiqəti əks etdirmədiyini yazıb.
Məlumata görə, ABŞ ilə Havana arasında nə birbaşa, nə də vasitəçi üzərindən rəsmi danışıqlar aparılır. Sayt həmçinin Meksikada gizli görüşlərin keçirilməsi barədə yayılan xəbərləri də “tamamilə uydurma” adlandırıb.
“Rubio Kuba hökumətini devirməyə çalışır”
“Dropsite News”un hesabatında qeyd olunur ki, danışıqlar barədə iddialar ABŞ Dövlət katibi Marko Rubionun Kuba hökumətinə qarşı siyasətinin tərkib hissəsi kimi qiymətləndirilə bilər. Nəşr Rubionun məqsədinin Havanadakı mövcud hakimiyyəti zəiflətmək olduğunu iddia edib.
Yanacaq böhranı və təzyiqlər
Meksikanın addımı diqqət çəkdi
Hesabatda vurğulanır ki, Kuba hazırda ciddi yanacaq böhranı ilə üzləşib. Bildirilir ki, Tramp administrasiyasının adaya yanacaq çatdırılmasının qarşısını almağa yönəlmiş tədbirləri daha təsirli olub.
Nəşr ABŞ-nin yeni sərəncamla Kuba ilə ticarət əlaqələri saxlayan ölkələrə gömrük rüsumları tətbiq etməklə hədələdiyini yazır. Bu fonunda Meksika Prezidenti Klaudia Şeynbaumın təzyiqlər qarşısında Havanaya neft göndərişlərini dayandırdığı iddia olunur.
ABŞ–Kuba münasibətlərində gərginlik
Vaşinqton və Havana arasında münasibətlər son illərdə yenidən gərginləşib. Sanksiyalar və iqtisadi məhdudiyyətlər Kuba iqtisadiyyatına ciddi təsir göstərir.
“Dropsite News”un təhlili göstərir ki, tərəflər arasında rəsmi danışıqların olmaması fonunda qarşılıqlı ittihamlar və təzyiqlər davam edir.
