ABŞ Prezidenti Donald Trampın ilhaq planlarına qarşı Danimarka və Qrenlandiyada genişmiqyaslı etiraz aksiyaları keçirilir.
The Guardian qəzetinin məlumatına görə, ABŞ-dən bir nümayəndə heyəti Danimarkanın paytaxtı Kopenhagda danimarkalı və qrenlandiyalı rəsmilərlə görüşlər apardığı bir vaxtda, Danimarka və Qrenlandiya küçələrində də ABŞ-nin ilhaq planlarına qarşı etirazlar təşkil olunur.
Kopenhagda keçirilən aksiyada etirazçılar üzərində “Əllərinizi Qrenlandiyadan çəkin” yazılmış plakatlarla ABŞ səfirliyinə yürüş etməyi planlaşdırırlar. Reuters agentliyinin bildirdiyinə görə, Danimarkadakı etirazlara minlərlə insanın qatıldığı təxmin edilir.
Kopenhagda keçirilən görüşlərdə ABŞ nümayəndə heyətinə rəhbərlik edən Demokrat senator Kris Kuns görüşdən sonra təşkil olunan mətbuat konfransında ABŞ-nin Danimarkaya və NATO-ya hörmət etdiyini bildirib. Kuns deyib: “Ümid edirəm ki, Danimarka Krallığının xalqı Amerika xalqına olan inamını itirməyəcək.”
Kuns əlavə edib: “Hazırda Qrenlandiya üçün hər hansı bir təhlükəsizlik təhdidi mövcud deyil. Lakin Arktika təhlükəsizliyi ilə bağlı daha yaxşı investisiyalar barədə araşdırma aparmaq üçün əsaslı səbəblər var. Buradan yenilənmiş baxışla Vaşinqtona qayıdırıq.”
Bu arada ABŞ Prezidenti Donald Tramp dünən Qrenlandiyanın ilhaq planını dəstəkləməyən ölkələrə gömrük rüsumları tətbiq etməklə hədələyib.
Trampın Qrenlandiyanı ilhaq planı
ABŞ Prezidenti Donald Tramp ölkəsinin Qrenlandiyanı əldə etməsi halında NATO-nun daha güclü və təsirli olacağını iddia etmişdi.
Tramp daha əvvəl Qrenlandiya ilə bağlı suallara cavabında demişdi: “Əgər biz Qrenlandiyanı almasaq, onu Rusiya və ya Çin alacaq. Mən prezident olduğum müddətdə bu baş verməyəcək. Təkcə hərbi mövcudluq kifayət deyil. Mülkiyyətə sahib olmalısınız.”
Çin və Rusiyaya məxsus sualtı qayıqların və digər hərbi gəmilərin Qrenlandiya ətrafında fəaliyyət göstərdiyini bildirən Tramp buna icazə verməyəcəklərini və “bir şəkildə Qrenlandiyanı alacaqlarını” söyləmişdi.
Danimarkaya bağlı muxtar bölgə olan Qrenlandiya isə daha əvvəl ABŞ-dən gələn, suverenliyin ötürülməsini də nəzərdə tutan bu cür yanaşmaları rədd etmişdi.
