Tarixi görüş: Şərə Ağ Evdə
ABŞ prezidenti Donald Tramp və Suriyanın keçid mərhələsi prezidenti Colani arasında Vaşinqtonda keçirilən görüş iki ölkə arasında yeni əməkdaşlıq mərhələsinin əsasını qoyub. Rəsmi məlumatlara görə, tərəflər ikitərəfli münasibətlərin gücləndirilməsi, iqtisadi sanksiyaların qaldırılması, “Qüds”lə təhlükəsizlik sazişi və “Suriya Demokratik Qüvvələri”nin (QSD) yeni orduya inteqrasiyası kimi mühüm məsələləri müzakirə ediblər.
Suriya Prezident Administrasiyasının bəyanatında bildirilib ki, görüş regional və beynəlxalq məsələlər üzrə konstruktiv və səmimi atmosferdə baş tutub.
Şeybani: “Görüş məhsuldar və ümidverici idi”
Suriya xarici işlər naziri Əsəd Şeybani görüşü “bənzərsiz və konstruktiv” adlandırıb. O, bildirib ki, müzakirələr Suriyanın gələcəyi, milli birliyi və yenidənqurma prosesinin sürətləndirilməsi istiqamətində aparılıb.
Nazir qeyd edib ki, “Suriya xalqı uzun illərdir davam edən böhrandan sonra daha yaxşı gələcəyə layiqdir” və Tramp–Şərə dialoqu bu məqsədə çatmaq üçün vacib addımdır.
Siyasi və təhlükəsizlik əməkdaşlığı
Suriya informasiya naziri Həmzə Mustafa isə açıqlamasında bildirib ki, Dəməşq beynəlxalq koalisiya ilə “İŞİD”-ə qarşı mübarizə çərçivəsində siyasi əməkdaşlıq bəyannaməsi imzalayıb.
Suriya Xarici İşlər Nazirliyi görüşü “tarixi” adlandıraraq qeyd edib ki, Trampın göstərişi ilə keçirilən sonrakı işçi görüşdə Əsəd Şeybani, ABŞ dövlət katibi Marko Rubio və Türkiyənin xarici işlər naziri Hakan Fidan iştirak ediblər. Bu görüşdə prezidentlərin razılaşdırdığı məsələlərin icrası üçün konkret mexanizmlər müəyyənləşdirilib.
Nazirliyin bəyanatına əsasən, tərəflər 10 mart tarixli razılaşmanın həyata keçirilməsini davam etdirmək barədə qərar veriblər. Sənəd “QSD” qüvvələrinin yeni Suriya ordusuna birləşdirilməsini və təhlükəsizlik strukturunun yenilənməsini nəzərdə tutur.
ABŞ: “Qüds”lə təhlükəsizlik razılaşması gündəmdədir”
ABŞ tərəfi bəyan edib ki, “Qüds”lə mümkün təhlükəsizlik sazişi regionun sabitliyini artırmağa yönəlib. Tramp həmçinin Suriyada iqtisadi inkişaf və investisiyaların bərpası səylərini dəstəklədiyini vurğulayıb.
Prezident bildirib ki, Vaşinqton “Sezar Qanunu” adlanan sanksiyaların mərhələli şəkildə ləğvini dəstəkləyir.
Tramp: “Suriya ilə münasibətləri yaxşılaşdırmaq niyyətindəyik”
Donald Tramp bəyan edib ki, ABŞ “Qüds”lə birgə Suriya ilə münasibətlərin normallaşması üzərində işləyir. O, Əhməd Şərənin “öz vəzifəsinin öhdəsindən uğurla gələcəyinə inandığını” söyləyib.
Səssiz ziyarət və sanksiyaların yumşaldılması
Əhməd Şərə Ağ Evə rəsmi elan olunmadan, arxa qapıdan daxil olub və bu, müasir tarixdə bir Suriya liderinin ilk belə səfəri olub. Görüş Səudiyyə Ərəbistanında baş tutan ilk təmasdan 6 ay sonra, ABŞ-ın bir keçmiş “Əl-Qaidə” üzvünü “xüsusi təhdid” siyahısından çıxarmasından bir neçə gün sonra keçirilib.
Görüşdən az sonra ABŞ Maliyyə Nazirliyi “Sezar Qanunu” çərçivəsində Suriyaya tətbiq olunan sanksiyaların 180 gün müddətinə qismən dayandırıldığını açıqlayıb. Rəsmi Vaşinqton bu addımı gələcəkdə tam ləğv istiqamətində atılmış mühüm addım kimi dəyərləndirib.
Yeni mərhələyə doğru
Reuters-in məlumatına görə, ABŞ Suriyada – xüsusilə Dəməşqdəki bir hərbi bazada daimi mövcudluq planlaşdırır. Analitiklər hesab edirlər ki, Tramp–Şərə görüşü regionda geosiyasi tarazlığa təsir göstərə biləcək yeni diplomatik mərhələnin başlanğıcıdır.
