Pekindən Tayvanla bağlı qəti mövqe
Çin Kommunist Partiyası Mərkəzi Komitəsinin Siyasi Bürosunun üzvü və xarici işlər naziri Vanq Yi Tayvan məsələsinin Çinin daxili işi olduğunu və ölkənin əsas milli maraqlarının ayrılmaz hissəsi sayıldığını bildirib. O, 2025-ci il üçün keçirilən “Beynəlxalq vəziyyət və Çin diplomatiyası” mövzusunda seminarda çıxışı zamanı bu mövqeni bir daha təsdiqləyib.
Vanq Yi vurğulayıb ki, Çinin yenidən birləşməsinə mane olmağa yönələn istənilən cəhd qaçılmaz olaraq iflasa uğrayacaq. Onun sözlərinə görə, bu məsələ yalnız tarixi deyil, həm də hüquqi və siyasi baxımdan Pekin üçün prinsipial xarakter daşıyır.
“Təxribatlara sərt cavab veriləcək”
Tayvan separatizmi və ABŞ silah satışları
Çin XİN rəhbəri çıxışında “Tayvan müstəqilliyi”ni təşviq edən qüvvələrin davamlı təxribatlarına və ABŞ-ın Tayvana genişmiqyaslı silah satışlarına toxunub. Vanq Yi bildirib ki, bu cür addımlar regional sabitliyi pozur və Pekin tərəfindən qətiyyətlə qarşılanacaq.
O qeyd edib: “Davam edən təxribatlara cavab olaraq biz möhkəm və güclü mövqe nümayiş etdirməliyik”. Vanq Yi əlavə edib ki, Çin suverenliyinin və ərazi bütövlüyünün qorunması dövlətin əsas vəzifəsidir.
Yenidən birləşmə “tarixi missiya” kimi təqdim olunur
Tayvanın qayıdışının 80 illiyi
Çin rəsmisi bildirib ki, cari il Tayvanın Çinə qayıdışının 80-ci ildönümünə təsadüf edir. Onun sözlərinə görə, vətənin tam yenidən birləşdirilməsi tarixi bir missiyadır və bu məqsədə çatmaq üçün milli suverenlik və ərazi bütövlüyü qanun çərçivəsində qorunmalıdır.
Vanq Yi həmçinin vurğulayıb ki, beynəlxalq müstəvidə Çinin mövqeyini dəstəkləyən ölkələrin sayı artmaqdadır. O qeyd edib ki, bir çox dövlətlər təkcə “vahid Çin” prinsipinə sadiqliyini təsdiqləmir, eyni zamanda Tayvanın müstəqilliyini müdafiə edən separatçı fəaliyyətlərə açıq şəkildə qarşı çıxır və Çinin yenidən birləşmə siyasətini dəstəkləyir.
Tayvandan sakitləşdirici mesajlar
Gərginliyin artırılmayacağı vədi
Digər tərəfdən, Tayvan rəhbərliyi Pekinlə münasibətlərdə gərginliyi artırmamaq mesajı verib. Tayvan rəhbəri Lay Çinq-Te bu gün yaydığı açıqlamada Pekini “təxribatlara məruz qoymamaq” və qarşıdurmanı dərinləşdirməmək niyyətində olduqlarını bildirib.
Lay sosial şəbəkədə paylaşımında “Məsuliyyətli davranacağıq, gərginliyi artırmayacaq və qarşıdurma yaratmayacağıq” ifadələrinə yer verib.
Çin ordusundan genişmiqyaslı təlimlər
Bu bəyanatlar fonunda Çin ordusu bu gün Tayvan adası ətrafında canlı döyüş sursatları ilə genişmiqyaslı hərbi təlimlərə başlayıb. “Ədalət missiyası – 2025” adlanan manevrlər regionda diqqətlə izlənilir və gərginliyin yeni mərhələyə keçə biləcəyi ehtimallarını artırır.
Hərbi təlimlərin Pekinin siyasi mesajlarını gücləndirdiyi və Tayvan məsələsində geri addım atılmayacağını nümayiş etdirdiyi bildirilir.
