Yəmən Səhiyyə Nazirliyi İsrailin son hava zərbələri nəticəsində ölənlərin sayının 35 nəfərə yüksəldiyini açıqlayıb. Yaralıların sayı isə 131 nəfərə çatıb. Hücumların əsas hədəfi paytaxt Səna və ətraf bölgələr olub.
Məlumatlara görə, İsrail qırıcıları Səna üzərinə ən azı altı dəfə hava hücumu həyata keçirib. Bununla yanaşı, Əmrən və Cövf vilayətlərində də mülki yaşayış məntəqələri bombalanıb.
Xarici İşlər Nazirliyinin sərt bəyanatı
Yəmən Xarici İşlər Nazirliyi açıqlama yayaraq, İsrailin hücumlarını “vəhşi təcavüz” adlandırıb və bunun nəticəsində böyük itkilərin baş verdiyini vurğulayıb. Nazirlik bəyan edib ki, bu hücumların cavabı gec-tez veriləcək və İsrail yüksək qiymət ödəyəcək.
Bəyanatda həmçinin bildirilib ki, mülki əhalini və yaşayış məntəqələrini hədəf almaq beynəlxalq hüququn, BMT konvensiyalarının və insan haqlarının kobud şəkildə pozulmasıdır.
Regionda gərginlik artır
Ekspertlər hesab edirlər ki, İsrailin Yəmənə qarşı açdığı bu cəbhə regiondakı gərginliyi daha da artıracaq. Yəmən rəsmiləri isə bəyan ediblər ki, bu hücumlar müqaviməti zəiflətməyəcək, əksinə, daha sərt cavab addımlarına gətirib çıxaracaq.
