Çempionlar Liqasında möhtəşəm qol gecəsi
UEFA Çempionlar Liqasının 3-cü turu azarkeşlər üçün unudulmaz anlarla yadda qaldı. İlk oyun günündə keçirilən 9 matçda ümumilikdə 43 qol vuruldu. Qol baxımından ilin ən məhsuldar gecələrindən biri yaşandı.
Saat 19:45 seansında iki oyun baş tutdu. Turnirin debütantı olan Qazaxıstan təmsilçisi “Kayrat” Kipr klubu “Pafos FC” ilə 0:0 hesablı bərabərliklə kifayətləndi. Digər matçda isə “Barselona” doğma meydanda “Olimpiakos”u darmadağın etdi.
“Barselona”dan 6 qolluq qələbə
Kataloniya nəhəngi “Barselona” – “Olimpiakos” qarşılaşmasında 6:1 hesablı inamlı qələbə qazandı.
Komandanın qollarını Fermin Lopes (7, 38, 76), Markus Rəşford (74, 79) və Lamin Yamal (68) vurdu.
Yunan təmsilçisi 53-cü dəqiqədə Ayub El-Kaabinin qolu ilə fərqlənə bilsə də, 57-ci dəqiqədə Santiyaqo Hezzeyin qırmızı vərəqə alması ilə 10 nəfərlə qaldı və oyunun axarını dəyişə bilmədi.
PSJ Almaniyada şou göstərdi – 7:2
Son çempion Paris Sen-Jermen səfərdə “Bayer Leverkuzen” üzərində əsl qol şousu sərgilədi. Fransız təmsilçisi 7:2 hesabı ilə qalib gələrək qrup liderliyini qorudu.
Qolları Vilyam Paço, Dezire Due (2), Xviça Kvaratsxeliya, Nuno Mendes, Usman Dembelen və Vitinya vurdu.
“İnter” dördlüklə qələbə qazandı – Çalhanoğlu fərqləndi
Belçikada keçirilən “Union Sen-Jilluaz” – “İnter” oyununda Milan təmsilçisi 4:0 hesablı qələbə əldə etdi.
Milli futbolçu Hakan Çalhanoğlu penalti zərbəsindən fərqlənərək komandasının ikinci qoluna imza atdı. Digər qolları Denzel Dəmfris, Lautaro Martines və Françesko Pio Espozito vurdu.
“Siti” və “Arsenal”dan inamlı çıxış
Pep Qvardiolanın rəhbərlik etdiyi “Mançester Siti” İspaniya səfərində “Vilyarreal”i Erling Haaland və Bernardo Silvanın qolları ilə 2:0 hesabı ilə məğlub etdi.
Londonda isə “Arsenal” “Atletiko Madrid” üzərində 4:0 hesablı inamlı qələbə qazanaraq qrupda zirvəyə yüksəldi.
Mourinho üçün ağır gecə
Joze Mourinyonun çalışdırdığı “Benfika” səfərdə “Nyukasl Yunayted” qarşısında çətinlik çəkdi və 0:3 hesabı ilə məğlub oldu. İngiltərə klubu meydanda tam dominantlıq nümayiş etdirdi.
Gecənin bütün nəticələri
-
Kayrat – Pafos FC: 0–0
-
Barselona – Olimpiakos: 6–1
-
PSV Ayndhoven – Napoli: 6–2
-
Vilyarreal – Mançester Siti: 0–2
-
Union Sen-Jilluaz – İnter: 0–4
-
Nyukasl Yunayted – Benfika: 3–0
-
Bayer Leverkuzen – PSJ: 2–7
-
Arsenal – Atletiko Madrid: 4–0
-
Kopenhagen – Borussiya Dortmund: 2–4
Bu nəticələrlə 3-cü tur futbol azarkeşləri üçün möhtəşəm qol gecəsi kimi tarixə düşdü.
