Çelsi 10 nəfərlik Ayaksı meydandan sildi
UEFA Çempionlar Liqasının qrup mərhələsinin 3-cü turunda İngiltərə təmsilçisi Çelsi, doğma meydanda Niderlandın Ayaks klubunu 5:1 hesabı ilə məğlub edib. “Stemford Bric”də keçirilən görüş London klubunun üstünlüyü ilə yadda qalıb.
Matçın əvvəlində Ayaks üçün hər şey istənilən kimi getmədi. Cəmi 15-ci dəqiqədə Kenni Teylor qırmızı vərəqə alaraq meydandan qovuldu. Rəqibin azlıqda qalmasından dərhal sonra Çelsi hücumlarını artırdı və 18-ci dəqiqədə Mark Quyo hesabı açdı.
Ard-arda gələn qollar
27-ci dəqiqədə Moisés Kaicedo fərqi iki topa çatdırdı. Lakin Ayaks 33-cü dəqiqədə Vout Veqorstun penaltidən vurduğu qolla hesabı 2:1-ə endirərək ümidlərini qorudu.
Çelsi ilk hissənin sonlarına yaxın yenidən təşəbbüsü ələ aldı. 45-ci dəqiqədə Enzo Fernandes penaltini dəqiq yerinə yetirərək üçüncü qolu vurdu. İlk hissəyə əlavə olunan vaxtda Estevao Uilyan da penalti ilə fərqlənərək hesabı 4:1 etdi.
Qələbəni möhkəmləndirən qol
İkinci hissənin 48-ci dəqiqəsində Terrik Corc matçın son nöqtəsini qoydu – 5:1. Ayaks bu mərhələdən sonra oyunda nə müdafiədə, nə də hücumda toparlana bildi.
Beləliklə, Çelsi matçdan 5:1 hesablı inamlı qələbə ilə ayrıldı və xallarını 6-ya yüksəltdi. London təmsilçisi hazırda turnir cədvəlində 11-ci pillədə qərarlaşıb.
Digər tərəfdən, Ayaks bu nəticə ilə böyük böhran içində qalır. Komanda Çempionlar Liqasındakı ilk üç oyununda da məğlub olub və hələlik xal toplaya bilməyib. Üç ardıcıl məğlubiyyətdən sonra niderlandlı azarkeşlər komandanın çıxışı ilə bağlı ciddi narazılıq ifadə ediblər.
Ekspertlər hesab edirlər ki, Çelsi bu nəticə ilə həm azarkeşlərinin etimadını qaytardı, həm də turnirdə növbəti mərhələyə iddiasını gücləndirdi.
