BVF: Yaxın Şərq iqtisadiyyatı möhkəmdir, lakin risklər davam edir
Beynəlxalq Valyuta Fondu (BVF) Yaxın Şərq və Şimali Afrika regionu üçün 2025-ci il üzrə iqtisadi artım proqnozunu 3,3% səviyyəsində müəyyən edib. Bu göstərici may ayında açıqlanan 2,6%-lik əvvəlki proqnozdan daha yüksəkdir.
Bununla belə, Fond xəbərdarlıq edib ki, qlobal iqtisadi qeyri-sabitlik və siyasi risklər səbəbindən regionun artım tempində azalma ehtimalı qalır. Hesabatda qeyd olunur ki, “geosiyasi gərginliklərdəki nisbi azalma müsbət siqnaldır, lakin risklər hələ də davam edir.”
BVF-nin Yaxın Şərq və Mərkəzi Asiya üzrə direktoru Cihad Əzur “Reuters”ə müsahibəsində bildirib ki, proqnozların yüksəlməsi region iqtisadiyyatlarının dayanıqlığını göstərir:
“Ticarət siyasətlərindəki qeyri-müəyyənliyə və qlobal inflyasiyanın təsirlərinə baxmayaraq, regionun iqtisadi göstəriciləri ümumilikdə müsbət istiqamətdədir.”
Neft ixracatçıları və idxalçıları üçün fərqli mənzərə
Əzur qeyd edib ki, neft ixrac edən ölkələr hasilatın artmasından, dövlət investisiyalarının çoxalmasından və iqtisadiyyatda şaxələndirmə proqramlarından faydalanır. Bu ölkələrdə büdcə sabitliyi və strateji infrastruktur layihələri iqtisadi artıma dəstək verir.
Digər tərəfdən, neft idxal edən ölkələr də xammal qiymətlərinin enməsi, turizmin canlanması və xaricdən göndərilən pul köçürmələrinin artması sayəsində bərpa prosesini sürətləndirir.
Enmə riskləri hələ də aktualdır
BVF rəsmisinin fikrincə, regionun iqtisadi gələcəyi üçün əsas risklərdən biri neft qiymətlərinin aşağı düşməsi və bununla bağlı gəlir azalmasıdır. Digər mühüm amillər kimi inflyasiyanın yüksəlməsi, qlobal ticarət gərginliklərinin artması və investisiya axınlarında zəifləmə göstərilib.
Əz’ur bildirib:
“Hazırkı şəraitdə risklər hələ də eniş istiqamətində qalır. Qlobal tələbin azalması və ticarət müharibələrinin yenidən alovlanması halında region iqtisadiyyatı ciddi təsir altına düşə bilər.”
“Ehtiyatlı olmaq vacibdir”
BVF hesab edir ki, Yaxın Şərqdə geosiyasi vəziyyətin son iki həftədə nisbətən sabitləşməsi ümidvericidir, lakin bu tendensiyanın davamlılığı üçün ehtiyatlı siyasət zəruridir.
Əz’ur vurğulayıb ki, iqtisadi sabitliyin qorunması üçün struktur islahatların davam etdirilməsi, fiskal intizamın gücləndirilməsi və sosial dəstək proqramlarının səmərəli idarə olunması əsas prioritetlər olmalıdır.
Beləliklə, beynəlxalq qurum regionda 2025-ci ildə iqtisadi artımın artacağını proqnozlaşdırsada, qarşıdakı il üçün diqqətli iqtisadi planlaşdırmanın vacibliyinə bir daha diqqət çəkib.
