Pirin dağında inanılmaz hadisə
Bolqarıstanda 17 il əvvəl axtarış siyahısına salınan və 12 ildir məhkəmə tərəfindən ölü elan edilən bir şəxs, Pirin Milli Parkında tapılıb. Hadisə ölkə ictimaiyyətində böyük rezonans doğurub.
Milli mətbuatın məlumatına görə, Pirin Milli Parkının əməkdaşları tərəfindən aparılan planlı yoxlama zamanı icazəsiz düşərgə quran bir kişi aşkar olunub. Nəzarətçilər şəxsiyyətini yoxlamaq istədikdə həmin adam aqressiv davranıb və bu səbəbdən əraziyə polis çağırılıb.
2008-ci ildən axtarışda olan şəxs
Polis əməkdaşlarının müdaxiləsindən sonra kimlik sənədləri olmayan şəxs Bansko rayon polis idarəsinə aparılıb. Burada aparılan araşdırma nəticəsində məlum olub ki, həmin şəxs 2008-ci ildə həm milli, həm də beynəlxalq səviyyədə axtarışa verilmiş və 2013-cü ildə tapılmadığı üçün məhkəmə qərarı ilə ölü elan edilmişdir.
İllərlə dağda tənha həyat
Pirin Milli Parkının müdiri Rosen Banenski mətbuata açıqlamasında bildirib:
“Görünür, bu şəxs Rusçuk şəhərindəndir və uzun illərdir Pirin dağlarında tənha həyat sürüb. Park əməkdaşlarının diqqəti sayəsində kimliyi artıq müəyyənləşdirilib.”
Məlumata görə, həmin şəxs illərlə dağda sığınacaq quraraq təbiət şəraitində yaşayıb, yerli sakinlərlə təmasdan qaçıb və hər hansı ictimai qeydiyyatda olmayıb.
Pirin dağları – Bolqarıstanın ikinci ən yüksək zirvəsi
Pirin dağları Bolqarıstanın Yunanıstan və Şimali Makedoniya sərhədlərinə yaxın ərazidə yerləşir. 2 min 914 metr hündürlüyə çatan zirvəsi ilə ölkənin ən yüksək ikinci dağ silsiləsi hesab olunur.
Təxminən 40 min hektarlıq ərazini əhatə edən Pirin Milli Parkı 1983-cü ildən UNESCO-nun Dünya İrsi Siyahısına daxildir. Park buzul gölləri, şəlalələri, mağaraları və iynəyarpaqlı meşələri ilə tanınır, həmçinin ayı və canavar kimi vəhşi heyvanların yaşayış məskənidir.
Hazırda hüquq-mühafizə orqanları həmin şəxsin dağda keçirdiyi illərlə bağlı araşdırmalara başlayıblar.
