BMT komissiyası İsraili soyqırımı ilə ittiham etdi
BMT-nin Fələstin əraziləri üzrə müstəqil beynəlxalq araşdırma komissiyası ilk dəfə olaraq İsrailin Qəzzada həyata keçirdiyi hərbi əməliyyatları “soyqırımı” kimi xarakterizə edib. Komissiya rəhbərliyi məsuliyyət daşımaqda günahlandırıb və Qəzzaya qarşı blokadanın dərhal qaldırılmasını, aclıq siyasətinə son qoyulmasını tələb edib.
Soyqırımı hərəkətləri
Komissiyanın bu gün açıqlanan hesabatında qeyd olunur ki, İsrail 7 oktyabr 2023-dən bəri həyata keçirdiyi əməliyyatlarla Soyqırım Cinayətinin Qarşısının Alınması və Cəzalandırılması Konvensiyasının müəyyən etdiyi beş hərəkətdən dördünü gerçəkləşdirib. Bunlara kütləvi qətllər, ciddi fiziki və psixoloji zərər yetirilməsi, fələstinlilərin qismən və ya tam məhvinə yönəlmiş həyat şəraitinin yaradılması, eləcə də nəsil artırmağa mane olan tədbirlərin tətbiqi daxildir.
Hesabatda vurğulanır ki, İsrailin mülki və hərbi rəhbərliyinin verdiyi açıq bəyanatlar, həmçinin təhlükəsizlik qüvvələrinin davranışları soyqırımı niyyətini açıq şəkildə göstərir.
“Açıq niyyət mövcuddur”
Komissiyanın sədri Navi Pillay açıqlamasında bildirib:
“Komissiya hesab edir ki, İsrail Qəzzada soyqırımı törədib. Burada fələstinliləri qismən və ya tamamilə məhv etməyə yönəlmiş aydın niyyət mövcuddur.”
Pillay əlavə edib ki, bu dəhşətli cinayətlərin məsuliyyəti İsrail hakimiyyətinin ən yüksək səviyyəsinə aiddir: “İki ilə yaxındır ki, məqsədli şəkildə fələstinliləri qrup halında məhv etməyə yönəlmiş bir kampaniya aparılır.”
Cəzasızlıq və beynəlxalq öhdəliklər
Komissiya həmçinin vurğulayıb ki, İsrail soyqırımının qarşısını almaq və günahkarları cəzalandırmaq öhdəliyini də yerinə yetirməyib. Əksinə, mümkün cinayətlərin araşdırılmasında və təqsirkarların məsuliyyətə cəlb edilməsində ciddi laqeydlik nümayiş etdirilib.
Hesabat 7 oktyabr 2023-dən 31 iyul 2025-ə qədər olan dövrü əhatə edir və əvvəlki bütün araşdırmaların nəticələri ilə yanaşı İsrailin Qəzzaya qarşı hücumlarını, hökumət orqanlarının davranış və bəyanatlarını ətraflı şəkildə təhlil edir.
Komissiya dünya dövlətlərinə çağırış edərək beynəlxalq hüquqa uyğun şəkildə soyqırımının dayandırılması və məsul şəxslərin cəzalandırılması üçün addımlar atmağa çağırıb.
