BMT: İsrailin Livandakı hücumları müharibə cinayətləridir və 1701 saylı qətnamənin kobud şəkildə pozulmasıdır
BMT-nin məhkəmə qərarı olmadan ölüm hallarına dair xüsusi məruzəçisi Morris Tidbol-Benz bu gün verdiyi bəyanatda İsrailin Livanda mülki şəxslərə və mülki obyektlərə qarşı həyata keçirdiyi hücumları “müharibə cinayətləri”, “BMT Nizamnaməsinin pozuntusu” və “BMT Təhlükəsizlik Şurasının 1701 saylı qətnaməsinin ağır şəkildə pozulması” kimi qiymətləndirib. O bildirib ki, bu hücumlar təsadüfi deyil, əksinə, İsrailin əhalinin sıx yaşadığı bölgələrdə həyata keçirdiyi ölümcül zərbələrin ardıcıl və narahatedici nümunəsidir.
Məruzəçi xüsusilə 18 noyabr 2025-ci ildə dron vasitəsilə həyata keçirilən və Sidanın yaxınlığındakı Ayn əl-Hilvə fələstinli qaçqın düşərgəsini hədəf alan hava hücumunu misal göstərib. Həmin hücum nəticəsində azı 14 nəfər, o cümlədən 12 uşaq şəhid olub, altı nəfər yaralanıb. BMT məlumatına görə, bu, 2024-cü ilin noyabrında elan olunan atəşkəsdən bəri ən qanlı hücumdur.
Livanda işğal edilmiş zonalar və birtərəfli hücumlar davam edir
Tidbol-Benz həmçinin İsrailin Livanın cənubunda beş mövqeni qanunsuz şəkildə işğal etməsini, eləcə də “təhlükəsizlik zolağı” adlandırdığı əraziləri nəzarətdə saxlamasını ağır beynəlxalq hüquq pozuntusu adlandırıb. Bu işğal mülki əhalinin öz evlərinə dönməsinə mane olur və hücumların davam etdirilməsi bölgədə gərginliyi daha da artırır.
Ekspert qeyd edib ki, bu hücumlar Livan hökumətinin atəşkəsin icrası, təhlükəsizliyin bərpası və ölkə əhalisi üçün ədalət və sabitliyin təmin olunması səylərinə ciddi ziyan vurur.
“Məsuliyyət daşıyanlar cəzalandırılmalıdır”
BMT məruzəçisi hücumlara görə məsuliyyət daşıyan hər kəsin — əməliyyatı planlaşdıran, əmri verən və ya icazə verən şəxslərin — beynəlxalq hüquqa uyğun şəkildə cavab verməli olduğunu bildirib:
“Qurbanlar və onların ailələri həqiqətə, ədalətə və tam təzminata çatmaq hüququna malikdir.”
Onun sözlərinə görə, Livanda hücumların yenidən alovlanması həm qurbanların, həm də onların ailələrinin həyatına ağır zərbə vurur və bölgədəki onsuz da kövrək olan sülh səylərini təhlükə altına alır.
İsrailin davam edən pozuntuları: 1701-in açıq şəkildə ayaqlanması
İsrail uzun müddətdir Livanın müxtəlif bölgələrinə, xüsusilə də cənubuna hava və artilleriya zərbələri endirir. Bu hücumlar 24 noyabr 2024-cü ildə ABŞ və Fransa vasitəçiliyi ilə əldə olunan “düşmənçilik fəaliyyətlərinin dayandırılması” razılaşmasını, həmçinin 2006-cı ildə qəbul edilmiş BMT-nin 1701 saylı qətnaməsini açıq şəkildə pozur.
Beynəlxalq hüquq müdafiəçiləri bildirirlər ki, İsrailin Livandakı hücumları regionda genişmiqyaslı eskalasiyaya yol açma riski daşıyır və beynəlxalq ictimaiyyətin buna qarşı ciddi tədbirlər görməsi vacibdir.
