Ben Qvir hökuməti tərk etməklə hədələyib
İsrailin “Yəhudi Gücü” (Otzma Yehudit) Partiyasının sədri və “milli təhlükəsizlik naziri” İtmar Ben Qvir HƏMAS-ın əsirlərin azad edilməsindən sonra fəaliyyətini davam etdirməsi halında hökumətdən çıxacağını bəyan edib.
O, ABŞ Prezidenti Donald Trampın vasitəçiliyi ilə təqdim olunan əsir mübadiləsi planına münasibət bildirərək deyib:
“Əsir və itkinlərimizin azad olunması şübhəsiz çox vacibdir. Amma bu müharibənin əsas məqsədi HƏMAS-ın varlığına son qoymaq olmalıdır. Bu təşkilat məhv edilməlidir.”
Ben Qvirin sözlərinə görə, əgər HƏMAS hərbi əməliyyatlardan sonra da mövcudluğunu qoruyub saxlayarsa, onun partiyası hökumətin bir hissəsi olmayacaq.
“Əgər HƏMAS varlığını davam etdirəcəksə, ‘Yəhudi Gücü’ Partiyası İsrailin ən böyük məğlubiyyətinin bir parçası olmayacaq,” – deyə o əlavə edib.
Ben Qvir həmçinin qeyd edib ki, bütün əsirlərin azad olunması sevindirici olsa da, “İsrail tarixində ən böyük fəlakəti törədən bir təşkilatın yenidən nəfəs almasına imkan vermək yolverilməzdir”.
Smotriç də Netanyahuya qarşı çıxıb
İsrailin maliyyə naziri Betsalel Smotriç də Baş nazir Benyamin Netanyahunun son qərarlarını tənqid edib. O, Qəzzaya hücumların dayandırılması və ilk dəfə olaraq “atəşkəs altında” danışıqlara razılıq verilməsini “fəlakətli səhv” adlandırıb.
Smotriç bildirib ki, bu qərar HƏMAS-a vaxt qazanmaq və yenidən güc toplamaq imkanı verir.
“Bu, HƏMAS üçün vaxt udmaq üçün ən asan yoldur. Biz belə addımlarla onu zəiflətmirik, əksinə, dirçəldirik,” – deyə o vurğulayıb.
İsrail hökumətində fikir ayrılığı dərinləşir
Son hadisələr İsrail hökumətinin daxilində ciddi fikir ayrılıqlarının yarandığını göstərir. Hökumətin sərt sağ qanad nümayəndələri – Ben Qvir və Smotriç – atəşkəsə və diplomatik prosesə qarşı çıxır, HƏMAS-ın tam məhvinin zəruri olduğunu bildirirlər.
Analitiklərə görə, bu gərginlik Netanyahunun hökumət koalisiyasını zəiflədə və yaxın zamanda siyasi böhrana yol aça bilər.
