Belçikada ümummilli etiraz: xidmətlər iflic oldu
Belçika işçi həmkarlar ittifaqları, hökumətin sosial xərcləri azaltmaq və əmək bazarını sərtləşdirmək planlarına qarşı bu gün bir günlük ümummilli tətil elan ediblər. Tətilə həm dövlət, həm də özəl sektor işçiləri geniş şəkildə qoşulub.
Uçuşlar və ictimai nəqliyyat dayandı
Brüssel və Şarlerua hava limanlarında işçilərin tətilə çıxması səbəbindən bütün çıxış istiqamətli uçuşlar ləğv olunub. Şarlerua Hava Limanında həm gediş, həm də gəliş istiqamətində fəaliyyət dayandırılıb. Brüssel Hava Limanında isə yalnız bir neçə təyyarənin enişinə icazə verilib.
Brüssel şəhərində metro, avtobus və tramvay xətləri üzrə reyslərin böyük hissəsi təxirə salınıb. Flandriya və Valoniya bölgələrində də ictimai nəqliyyat işçiləri tətilə qoşulduqlarından, nəqliyyat sistemi ümumilikdə iflic vəziyyətə düşüb.
Təhsil, bələdiyyə və səhiyyə sahələri də təsirləndi
Tətilə müəllimlərin fəal şəkildə qatılması bəzi məktəblərdə dərslərin dayanmasına səbəb olub. Bələdiyyə işçilərinin işə çıxmaması isə məişət tullantılarının yığılmasını, uşaq bağçalarının və yerli idarə xidmətlərinin fəaliyyətini ciddi şəkildə pozub.
Bundan başqa, ölkə üzrə səhiyyə və poçt xidmətləri də tətil səbəbindən çətinliklərlə üzləşib.
Hökumətin planları və həmkarlar ittifaqlarının mövqeyi
Belçika hökuməti pensiya yaşının artırılması, işsizlik və xəstəlik müavinətlərinə çıxış şərtlərinin sərtləşdirilməsi, eləcə də uzunmüddətli xəstələrə yönəlmiş sosial dəstək sisteminin məhdudlaşdırılması kimi addımlar atmaq niyyətindədir.
Həmkarlar ittifaqları isə bu dəyişiklikləri “sosial ədalətin pozulması” kimi qiymətləndirir və hökumətin qənaət siyasətinə qarşı kəskin etirazlarını bildirirlər.
Brüsseldə kütləvi etiraz yürüşü
Tətil günü minlərlə insan Brüsselin mərkəzində hökumət siyasətlərinə etiraz etmək üçün küçələrə axışıb. Aksiya iştirakçıları Şimal Dəmiryolu Stansiyasından başlayaraq Midi Stansiyasına qədər yürüş ediblər.
Yaşıl, qırmızı və mavi rəngli həmkarlar ittifaqı bayraqları ilə iştirak edən nümayişçilər “Hökuməti dayandırın”, “Müharibəyə pul var, amma pensiyaya yox” və “Haqlarımıza toxunmayın” kimi şüarlar səsləndiriblər.
Yürüş səbəbindən Brüsselin mərkəzi küçələri nəqliyyata bağlanıb, şəhərdə ciddi tıxaclar yaranıb.
