Belçika təhlükəsizlik orqanları sui-qəsd planını vaxtında aşkar edib
Belçikanın Federal Prokurorluğu bu gün ölkədə siyasətçilərə qarşı planlaşdırılan terror hücumunun qarşısının alındığını açıqlayıb. Rəsmilərin bildirdiyinə görə, təhlükəsizlik qüvvələri terrorçu hüceyrəni aşkar edərək tam şəkildə zərərsizləşdirib.
Məlumata əsasən, sözügedən qrup bir neçə siyasi fiquru, o cümlədən baş nazir Bart de Viveri hədəf seçmişdi. Qrup üzvləri arasında bir neçə şübhəli şəxs artıq saxlanılıb və onların ölkə daxilindəki əlaqələri araşdırılır.
Araşdırma genişləndirilib
Belçika mətbuatının məlumatına görə, əməliyyat kəşfiyyat və antiterror xidməti tərəfindən bir neçə həftəlik izləmədən sonra həyata keçirilib. Təhlükəsizlik qüvvələri planın “siyasi motivli və yüksək səviyyədə koordinasiya olunmuş” olduğunu açıqlayıb.
Hazırda istintaq orqanları qrupun xarici əlaqələri və maliyyə mənbələri üzərində iş aparır. Prokurorluq bildirib ki, hüceyrə “əldəqayırma silah və partlayıcı maddələr hazırlamaq” istiqamətində fəaliyyət göstərirmiş.
Baş nazirə qarşı təhdid təsdiqlənib
Belçika hökumətinə yaxın mənbələr təsdiqləyiblər ki, baş nazir Barta de Viver hücum planında birbaşa hədəflərdən biri olub. Rəsmi Brüssel bu hadisəni dövlət təhlükəsizliyinə qarşı ciddi təhdid kimi qiymətləndirib və bütün nazirlərə əlavə mühafizə tədbirləri tətbiq edib.
“Təhlükəsizlik prioritetimizdir” – hökumətdən açıqlama
Belçikanın Daxili İşlər Nazirliyindən verilən açıqlamada bildirilir:
“Hökumət təhlükəsizlik xidmətləri ilə tam koordinasiya içində çalışır. Demokratik sistemimizə qarşı istənilən təhdid dərhal və sərt şəkildə cavablandırılacaq.”
Hazırda əməliyyatla bağlı istintaq məxfi statusda davam edir.
