Sındırğı zəlzələsi bölgədə dağıntılara səbəb oldu
Türkiyənin Balıkəsir şəhərinin Sındırğı rayonunda gecə saat 22:48-də 6,1 bal gücündə baş verən zəlzələ bölgədə ciddi zərər doğurub. Fövqəladə Halların İdarə Edilməsi Agentliyinin (AFAD) məlumatına görə, zəlzələnin ocağı yerin təxminən 6 kilometr dərinliyində olub. Güclü sarsıntı təkcə Balıkəsirdə deyil, Manisa, İzmir, Bursa və Çanaqqala kimi qonşu şəhərlərdə də aydın hiss edilib.
Səhərin ilk işıqları ilə birlikdə Sındırğıda dron vasitəsilə çəkilən görüntülər zəlzələnin təsirinin miqyasını üzə çıxarıb. Rayonda üç bina tamamilə çöküb, bir çox yaşayış binası isə ağır zərər görüb.
Manisada evin tavanı çökdü
Zəlzələ Manisanın Gördes rayonuna da təsir edib. Oğulduruk kəndində yerləşən bir mərtəbəli evin tavanı çöküb, divarlarda dərin çatlar yaranıb. Evdə olan sakinlər böyük panika keçiriblər, lakin xəsarət alan olmayıb.
Hadisədən sonra əraziyə AFAD və jandarma qrupları cəlb olunub. Hazırda bölgədə ilkin qiymətləndirmə və təhlükəli binaların boşaldılması prosesi həyata keçirilir.
Rəsmi açıqlama: “Can itkisi yoxdur”
Daxili İşlər naziri Əli Yerlikaya hadisə yerinə gələrək vəziyyətlə tanış olub. Nazir bildirib ki, əvvəlki illərdə zərər görərək istifadədən çıxarılmış üç bina və iki mərtəbəli bir dükan çöküb, lakin həmin tikililərdə heç kim yaşamayıb.
Yerlikaya qeyd edib ki, “hazırda heç bir can itkisi və dağıntı altında qalan yoxdur. Yalnız iki nəfər panika zamanı yüngül şəkildə yaralanıb.” Nazir həmçinin kəndlərdə də yoxlamaların aparıldığını vurğulayıb.
Kiçik təkanlar davam edir
AFAD-ın məlumatına əsasən, bölgədə kiçik sarsıntılar davam edir. Sakinlərə zərər görmüş evlərinə qayıtmamaları və təhlükəsizlik tədbirlərinə riayət etmələri tövsiyə olunub.
Bölgədə hazırda hasar qiymətləndirmə işləri aparılır, riskli binaların siyahısı hazırlanır. Qurtarma və yardım qrupları gecə boyu fəaliyyətlərini davam etdiriblər.
Mütəxəssislər bölgədə yeni kiçik təkanların baş verə biləcəyini istisna etmir və vətəndaşlara ehtiyatlı davranmağı tövsiyə edirlər.
