Şiə təqlid mərcələrindən olan Ayətullah Abdullah Cavadı Amuli, düşmənə, xüsusilə də İsrailə qarşı daim ayıq-sayıq olmağın zəruriliyini vurğulayaraq dedi: “Necə ki, oruclu insan məz-məzə edərkən dadı hiss edir, amma orucu pozulmur, mömin insan da şüurlu bir diqqətlə qəfləti minimuma endirməli, ağıl və qəlbi öz varlığının imamı etməlidir.”
Ayətullah Cavadı Amulinin həftəlik əxlaq dərsi bu səhər Qum şəhərindəki Əzəm məscidində cəmiyyətin müxtəlif təbəqələrinin iştirakı ilə keçirildi.
Dərsində “Şübhəsiz ki, bu qəlblər bədənlərin yorulduğu kimi yorulur; elə isə onları hikmətin incəlikləri ilə təravətləndirin” hikmətli kəlamına istinad edən Cavadı Amuli, qəlbin qorunmasının və ilahi mərifətlərlə bəslənməsinin zəruri olduğunu vurğuladı. Qəlbin dirildilməsinin yeganə yolunun hikmət, Quran, dua və münacatdan keçdiyini ifadə etdi.
Quran məntiqində “xəlifəlik” anlayışını izah edən Cavadı Amuli bildirdi ki, həqiqi xəlifə öz fikir və həvəsini deyil, onu vəzifələndirənin sözünü ifadə edən şəxsdir. Bu səbəbdən imamət və nübüvvət məqamlarının qazanılmış və ya öyrənilmiş məqamlar olmadığını, bunların yalnız Uca Allah tərəfindən verilən “ilahi əhd” olduğunu dedi.
İmamət və xəlifəliyin ilahi tərbiyə və Allahın əhdi ilə gerçəkləşdiyini qeyd edən Cavadı Amuli, peyğəmbərlərin və imamların “Xəlifətullah” olduqlarını, lakin imamətin yalnız elm əldə etməklə və ya bəşəri səylərlə qazanıla bilməyəcəyini vurğuladı. Bir insanın təhsil yolu ilə ictihad, hikmət və oxşar mərtəbələrə çata biləcəyini, lakin imamın elminin və möcüzəsinin dərs və akademik üsullarla əldə edilə bilməyəcəyini dedi.
Çıxışının başqa bir hissəsində Həzrət Əlinin (ə) sözlərinə istinad edən Cavadı Amuli, ölüm ilə birlikdə insanın əbədiyyət aləminə daxil olduğunu bildirərək dedi: “Ölüm bir şəhərdən və ya ölkədən çıxış deyil, tarixdən çıxışdır. İnsan gözünü yumduğu anda əbədiyyət səhnəsinə qədəm qoyur. Bu səhnə sonsuzdur və ora əliboş daxil olmaq olmaz.”
Qəlbin üzvlər və orqanların idarəsindəki roluna diqqət çəkən Cavadı Amuli, imamların şagirdi olmağın, onların gətirdiklərini öyrənib həyata keçirməyin zəruri olduğunu bildirdi. Qəlb və ağıl bədənin imamı olduğu zaman gözün, əlin və ayağın haqq yolunda hərəkət edəcəyini, əks halda insanın zülm və cahiliyyət vadisinə sürüklənəcəyini dedi.
“İmamət və ümmət sistemi”nin digər sistemlərdən köklü şəkildə fərqləndiyini vurğulayan Cavadı Amuli, hövzə və universitetlərin təhsil vermək və cəhaləti aradan qaldırmaq, məscid və dini heyətlərin isə əxlaqi tərbiyə və şüur qazandırmaq vəzifəsini daşıdığını, lakin bütün bu fəaliyyətlərin imamət sistemi daxilində məna qazandığını ifadə etdi. Ona görə imamət və ümmət sistemi cahiliyyəni aradan qaldırmaq məsuliyyətini daşıyır.
Cavadı Amuli, qəlbin Quran, gecə namazı, dua və münacatla diri saxlanmasının fərd və İslam cəmiyyəti üçün daimi bir zərurət olduğunu bildirərək, qəlbin qəflət yuxusuna getməsinə əsla icazə verilməməli olduğunu xatırlatdı.
Xüsusilə ictimai və siyasi sahələrdə “qəflət yuxusu”na qarşı xəbərdarlıq edən Ayətullah Cavadı Amuli, Həzrət Əlinin (ə) bu xəbərdarlığını xatırlatdı: “Siyasi, ictimai və iqtisadi yuxu gözdə yalnız məz-məzə həddində olmalıdır; əsla bundan irəli getməməlidir.” Düşmənin yatmadığını vurğulayan Cavadı Amuli dedi: “Ölkəni xaosa sürükləmək üçün pusquda gözləyən düşmən və İsrail qarşısında ayıq olmaq lazımdır. Mömin insan şüurlu bir diqqətlə qəfləti minimuma endirməli, ağıl və qəlbi öz varlığının imamı etməlidir.”
