Eurovision 2026 öncəsi İsrail böhranı dərinləşir
Avropa ölkələrində 2026 Eurovision Mahnı Müsabiqəsi ərəfəsində İsrailə qarşı narazılıq getdikcə artır. Qəzzada həyata keçirilən hücumları pisləyən bir çox Avropa dövləti, İsrailin yarışmadan uzaqlaşdırılmaması halında tədbiri boykot edəcəklərini bəyan edib.
İspaniya, İrlandiya, İslandiya, Hollandiya, Sloveniya və Belçika hökumətləri, İsrailin Qəzzada törətdiyi hərbi cinayətləri əsas gətirərək, onun yarışmaya qatılmasına icazə verilməməsini tələb ediblər. Bu ölkələr Tel-Əvivin yarışmada yer alacağı təqdirdə tədbirdə iştirak etməyəcəklərini rəsmən açıqlayıblar.
ABŞ təzyiqi və Avropadakı bölünmə
Buna baxmayaraq, ABŞ-ın təzyiqləri və sionist lobbilərin təsiri altında olan bəzi Avropa hökumətləri İsrailə dəstək mövqeyindən geri çəkilmir. 2026-cı ildə Eurovision-a ev sahibliyi etməyə hazırlaşan Avstriya, İsrailin yarışmadan kənarlaşdırılması halında tədbirdən imtina edəcəyini bildirib.
Avstriyanın baş naziri Kristian Ştokerin açıqlamasına görə, “İsrailin yarışmadan uzaqlaşdırılması qəbulolunmaz addım” olardı.
Oxşar mövqe Almaniyanın baş naziri Fridrix Mers tərəfindən də səsləndirilib. O, “İsrailin müsabiqədən çıxarılması qəbuledilməzdir” deyərək Almaniyanın bu halda Eurovision-a qatılmamalı olduğunu vurğulayıb. Bu açıqlama Berlin hökumətinin insan haqları mövqeyinə zidd siyasətini bir daha gündəmə gətirib.
Avropa Yayım Birliyi qərarı təxirə saldı
Artan ictimai təzyiq fonunda Avropa Yayım Birliyi (EBU) İsrailin yarışmaya qatılıb-qatılmaması ilə bağlı səsverməni təxirə salıb. BBC-nin məlumatına görə, EBU rəhbərliyi “Yaxın Şərqdəki son hadisələr fonunda üzvlərlə birbaşa görüş keçirilməsi” qərarını verib.
Lakin mənbələr bildirir ki, ABŞ və İsrailin siyasi təzyiqləri səbəbindən EBU rəhbərliyi fövqəladə iclas keçirməkdən imtina edib və məsələni dekabr ayında keçiriləcək ümumi yığıncağa qədər ertələyib. Bu qərar Avropa mədəni institutlarının da siyasi təsirlərdən tam azad olmadığını bir daha ortaya qoyub.
“Böyük beşlik” içində parçalanma
Müsabiqənin əsas maliyyə dayağını təşkil edən “böyük beşlik” — Böyük Britaniya, İspaniya, Fransa, Almaniya və İtaliya — hazırda bu məsələdə fikir ayrılığı yaşayır. İspaniya və Fransa İsrailin yarışmadan çıxarılmasını dəstəkləyərkən, Almaniya və İtaliya ABŞ xəttinə yaxın mövqe sərgiləyir.
Avropa ictimaiyyətində isə artan təzyiq və Qəzzada baş verən faciələr fonunda, İsrailin Eurovision kimi mədəni platformalarda yer almasının “etik baxımdan yolverilməz” olduğu fikri güclənməkdədir.
