az.rasthaber.com xəbər verir ki, Avropa Komissiyasının vitse-prezidenti Tereza Ribera İsrailin Qəzzaya qarşı apardığı müharibəni açıq şəkildə “soyqırımı” adlandırıb. O, bununla Komissiya rəhbərliyi içində bu ifadədən istifadə edən ilk yüksək səviyyəli rəsmiyə çevrilib.
Ribera Parisdə Sciences Po universitetində yeni tədris ilinin açılış mərasimində çıxış edərək bildirib:
“Qəzzadakı soyqırımı Avropanın hərəkətsizliyini və vahid mövqedən danışa bilməməsini üzə çıxarır. Halbuki Avropa şəhərlərində etirazlar artır, BMT Təhlükəsizlik Şurasının 14 üzvü dərhal atəşkəs tələb edir.”
Ribera avqust ayında İsrailin hücumlarının “çox böyük ehtimalla soyqırımına bənzədiyini” söyləmiş, lakin bunu açıq şəkildə elan etməmişdi. Bu dəfəki bəyanatı isə Avropa Komissiyasının mövcud mövqeyindən daha sərt olub. Komissiya indiyə qədər yalnız İsrailin insan haqlarını pozduğunu bildirirdi, lakin soyqırımı ifadəsindən qaçırdı.
Məlumata görə, 2023-cü ilin oktyabrından bəri 60 mindən çox fələstinli İsrail hücumları nəticəsində həyatını itirib.
İrlandiya, Niderland və İspaniya kimi ölkələr artıq İsraillə münasibətlərin yenidən nəzərdən keçirilməsini tələb ediblər. Avropa İttifaqının İsraillə assosiasiya sazişi həm ticarət, həm də siyasi əlaqələrin əsasını təşkil edir. Rəsmi məlumatlara görə, İsrailin ümumi ticarətinin təxminən üçdə biri Aİ ilə aparılır.
Qəzzadakı davamlı müharibə fonunda bir sıra ölkələr Fələstin dövlətini tanıyacaqlarını açıqlayıb və Aİ ilə İsrail arasındakı müqavilənin dayandırılması çağırışları da getdikcə güclənir.
