Salibanın Arsenal karyerası
Fransalı müdafiəçi Uilyam Saliba 2019-cu ilin yayında Sent-Etyen klubundan Arsenala transfer olunmuşdu. O vaxtdan bəri bütün turnirlərdə 140 oyuna çıxaraq komandanın müdafiə xəttində ən etibarlı oyunçularından birinə çevrilib.
Karyerasının əvvəlində Sent-Etyen, Nissa və Marsel klublarına icarəyə verilən Saliba, qısa zamanda potensialını nümayiş etdirdi. O, Fransa Liqasının ən yaxşı gənc oyunçusu seçilmiş, həmçinin 2021–2022 mövsümündə liqanın rəmzi komandasında yer almışdı.
Arsenal ilə yüksəliş
Salibanın Arsenal forması ilə ilk oyunu 2022-ci ildə Kristal Palasa qarşı olmuşdu. O, cəmi iki həftə sonra Bornmutla matçda ilk qolunu vuraraq diqqət çəkmişdi. Ardınca Premyer Liqada üç mövsüldür ardıcıl olaraq mövsümün rəmzi komandasına daxil edilib və 2024-cü ildə “FIFA The Best” komandasına seçilib.
Klub rəhbərliyindən açıqlamalar
Arsenalın idman direktoru Andrea Berta açıqlamasında Salibanı “dünyanın ən yaxşı müdafiəçilərindən biri” adlandırıb. Baş məşqçi Mikel Arteta isə onun liderlik keyfiyyətlərini vurğulayaraq, “Uilyam bütün komanda tərəfindən sevilir və biz inanırıq ki, hələ ən yaxşısı qarşıdadır” deyib.
Gələcək planlar
Yeni müqavilə ilə Saliba 2030-cu ilə qədər Arsenalın müdafiə xəttinin təməl oyunçusu olacaq. Klub rəhbərliyi onun təcrübəsinin və oyun keyfiyyətlərinin uzun illər ərzində komandanın uğurlarına töhfə verəcəyinə inanır.
