Mileyə qarşı cinayət şikayəti verildi
Argentinada iki vəkil Prezident Xavyer Miley barəsində cinayət şikayəti təqdim edib.
Şikayətdə Miley dövlət vəsaitlərindən qanunsuz istifadə etməkdə və xidməti səlahiyyətlərini aşmaqda ittiham olunur.
“Dövlət resurslarından siyasi məqsədlər üçün istifadə edib”
Vəkillər Xose Macionkalda və Xuan Martin Fasio bildiriblər ki, Miley Braziliyaya son səfəri zamanı dövlət resurslarından rəsmi vəzifələrindən kənar məqsədlər üçün istifadə edib.
Onların iddiasına görə, prezident sağçı siyasətçi Flavio Bolsonaroya siyasi dəstək göstərmək üçün prezident təyyarəsindən, rəsmi nümayəndə heyətindən və dövlət büdcəsinin vəsaitlərindən yararlanıb.
Lula ilə bağlı açıqlamalar da şikayətə daxil edilib
Şikayətdə Mileyin Braziliya Prezidenti Luiz İnasio Lula da Silvanı təhqir edən ifadələr işlətməsi də əsas ittihamlardan biri kimi göstərilib.
Bundan əlavə, onun Braziliya Ali Federal Məhkəməsinin hakimi Aleksandr de Moraes haqqında səsləndirdiyi fikirlərin qonşu dövlətin daxili işlərinə müdaxilə və beynəlxalq hüququn prinsiplərinin pozulması olduğu iddia edilir.
Səfərlə bağlı sənədlər tələb olunub
İddiaçılar sübutların toplanması məqsədilə Nazirlər Kabinetindən və hərbi qurumlardan prezidentin Braziliyaya səfəri ilə bağlı bütün xərclər, nümayəndə heyəti və istifadə olunan dövlət resursları haqqında məlumat təqdim edilməsini istəyiblər.
Məhkəmə araşdırması başlaya bilər
Əgər məhkəmə şikayəti icraata qəbul etsə, növbəti mərhələdə Prezident Xavyer Miley ifadə vermək üçün Argentina məhkəməsinə çağırıla bilər.
