İsrail hərbçisindən Alman mediasına şok etiraflar
Soyqırım siyasəti ilə gündəmə gələn İsrail ordusunun keçmiş ehtiyat hərbçisi, adını açıqlamayan bir israilli, Almaniyanın Morgenpost qəzetinə Sde Teiman Həbsxanasında Qəzzalı məhbuslara qarşı tətbiq edilən ağır işgəncələri etiraf edib. Müsahibəsində o, müəssisədəki vəziyyəti “insanlarla dolu nəhəng qəfəslər, 24 saat bağlı saxlanılan məhbuslar və sistemli şiddətin gündəlik normaya çevrildiyi bir yer” kimi təsvir edib.
İnsan haqları təşkilatları tərəfindən “İsrailin Quantanamosu” adlandırılan Sde Teimanın vəziyyəti barədə danışan keçmiş hərbçi bildirib ki, orada “intiqam atmosferi” hökm sürürdü və zabitlər açıq şəkildə məhbuslara qarşı fiziki zorakılığı təşviq edirdilər.
Onun sözlərinə görə, göz bağının altından baxdığı üçün cəzalandırılan bir fələstinli metal divara söykənərək dəfələrlə döyülüb, daha sonra “açıq yaralarla” hücrəyə aparılıb.
Cinsi zorakılıq və ağır yaralanmalar haqqında iddialar
Məqalədə yer verilən digər ifadələr vəziyyətin daha dəhşətli ölçüdə olduğunu göstərir. Qüds İbrani Universitetinin anesteziologiya professoru Yoel Donxin sahra xəstəxanasında müalicə etdiyi bir fələstinli məhbusun zorlamaya məruz qaldığını və ağır yaralandığını bildirib.
Həkimlər İnsan Haqları Təşkilatının (PHRI) nümayəndəsi Oneq Ben Dror isə müəssisədə “sənədləşdirilməmiş çox sayda cinsi zorakılıq halının” olduğunu vurğulayıb.
Qızıl Xaça giriş qadağası və işgəncə məqsədli qida qıtlığı
Qəzetin məlumatına görə, xroniki xəstəlikləri olan məhbusların dərmanlarına çıxışı qadağan edildiyi üçün ötən həftə bir fələstinli həyatını itirib. Eyni zamanda məhbuslara qəsdən qida təchizatı məhdudlaşdırılır, bu da işgəncə metodlarından biri kimi istifadə olunur.
İsrail hökuməti həmçinin Beynəlxalq Qızıl Xaç Komitəsinin həbsxanaya girişinə icazə vermir. Məhkəmələrin videobağlantı ilə keçirilməsi səbəbilə hakimlər məhbusların fiziki vəziyyətini görmək imkanından məhrum edilir.
BMT: “Uşaqlar da daxil olmaqla sistemli işgəncə var”
İsrail Baş naziri Benyamin Netanyahu həbsxanalardakı sistemli zorakılıq və işgəncə iddialarına cavab verməkdən yayınır.
BMT İşgəncələrə Qarşı Komitə isə keçən həftə yayımladığı açıqlamada, fələstinlilərə – uşaqlar da daxil olmaqla – sistematik işgəncə və qeyri-insani rəftarla bağlı məlumatlardan “dərin dəhşət” duyulduğunu bildirib.
Müxtəlif beynəlxalq təşkilatlar uzun müddətdir Sde Teiman kimi həbs mərkəzlərində baş verən zorakılıqların araşdırılması üçün müstəqil monitorinq tələb edir.
