Afrində terror şəbəkələrinə qarşı geniş əməliyyat
Suriya Daxili İşlər Nazirliyi Hələb vilayətində daxili təhlükəsizlik orqanlarının Baş Kəşfiyyat İdarəsi ilə birgə Afrin bölgəsində yeni antiterror mərhələsinə başladığını açıqlayıb. Nazirliyin məlumatına əsasən, əməliyyat “İŞİD” qruplaşmasının bölgədə gizlənən hüceyrələrinin zərərsizləşdirilməsi və onların istifadə etdiyi sığınacaqların aşkar olunmasına yönəlib.
Afrin, Türkiyəyə yaxın sərhəd bölgəsində yerləşdiyindən uzun müddətdir müxtəlif silahlı qrupların fəaliyyətində strateji əhəmiyyət daşıyır. Rəsmi qurumların açıqlamalarına görə, “İŞİD” qalıqlarının bu ərazidə sabitliyi pozacaq təxribatlar planlaşdırdığı, həmçinin mülki əhalinin təhlükəsizliyinə real təhdid yaratdığı müəyyən edilib. Operativ qruplar bölgədə hədəfləri dəqiqliklə izlədiklərini, əməliyyatların növbəti günlərdə də davam etdiriləcəyini bildiriblər.
Laziqiyyədə otel qalmaqalı silahlı toqquşma ilə nəticələndi
Suriya sahillərində yerləşən Laziqiyyə vilayətinin şimalındakı Bədrosiyə qəsəbəsi bu gün ciddi təhlükəsizlik insidenti ilə gündəmə gəlib. Bir neçə həftə əvvəl türkmən mənşəli bir silahlı qrup qəsəbədə yerləşən otellərdən birini qanunsuz şəkildə ələ keçirərək sahibini güc tətbiqi ilə oradan uzaqlaşdırmışdı. Obyekt sahibi məsələ ilə bağlı təhlükəsizlik qüvvələrinə müraciət etmiş, aparılan yoxlama nəticəsində obyektin mülkiyyət hüququnun ona məxsus olduğu təsdiqlənmişdi.
Bu gün təhlükəsizlik əməkdaşlarının otelin boşaldılması barədə qərarı icra etməyə gəlməsi mübahisənin qısa müddətdə gərginləşməsinə səbəb olub. Silahlı qrupun ərazini tərk etməkdən imtinası əvvəlcə sərt sözlü qarşıdurmaya, daha sonra isə atışmaya çevrilib. Hadisə nəticəsində həm təhlükəsizlik qüvvələri, həm də türkmən silahlı dəstəsi arasında ölən və yaralananların olduğu bildirilir.
Atışmanın səsindən sonra bölgədəki digər türkmən qruplar da qəsəbəyə daxil olaraq silahlı dəstəyə dəstək göstərməyə başlayıb. Bunun ardınca təhlükəsizlik orqanları əlavə qüvvələr yerləşdirərək Bədrosiyəyə giriş-çıxışı tam bağlayıb, mülki əhalinin əraziyə yaxınlaşmasını məhdudlaşdırıb. Vilayətdə vəziyyət hələ də gərgin olaraq qalır.
