ABŞ BMT-də atəşkəsə veto qoydu
BMT Təhlükəsizlik Şurası Qəzzada dərhal atəşkəsin elan olunmasını tələb edən qətnamə layihəsini qəbul edə bilməyib. ABŞ layihəni veto edərək qərarı əngəlləyib. Bu, layihənin lehinə səs verən 14 üzv dövlətin iradəsinə baxmayaraq baş verib.
Layihədə atəşin dayandırılması, girovların azad edilməsi, humanitar yardımın bölgəyə daxil olması və aclığın qarşısının alınması kimi müddəalar yer alırdı.
ABŞ-ın əsas arqumenti
ABŞ nümayəndəliyi layihəni “tərazsız” adlandıraraq onun “HƏMAS-ı qınamadığını” və “İsrailə özünü müdafiə haqqı tanımadığını” əsas səbəb kimi göstərib.
Qeyd edək ki, bu, Vaşinqtonun ilk belə addımı deyil. ABŞ daha əvvəl də dəfələrlə İsrailin hərbi əməliyyatlarını dayandırmağa və ya pisləməyə yönəlmiş qətnamələri eyni şəkildə vetolayıb.
Qəzzada davam edən faciə
Artıq 23 aya yaxındır ki, Qəzza zolağı İsrailin davamlı hücumları altında qalır. Şiddətli bombardman, blokada və aclıq səbəbindən bölgədə dəhşətli humanitar böhran hökm sürür.
Son rəqəmlərə görə, indiyədək təxminən 230 min fələstinli həlak olub və ya yaralanıb. Onlarla min insan isə hələ də itkin və ya İsrail həbsxanalarında saxlanılır.
Beynəlxalq ictimaiyyətin reaksiyası
Bir çox ölkə ABŞ-ın bu qərarını tənqid edərək, Vaşinqtonun İsrailin hərbi əməliyyatlarına açıq dəstək verdiyini bildirir. Ekspertlər hesab edir ki, bu veto ABŞ-ın beynəlxalq nüfuzuna əlavə zərbə vuracaq və humanitar böhranın dərinləşməsinə səbəb olacaq.
