Humanitar əsaslarla qərar
ABŞ Maliyyə Nazirliyi Venesuela mənşəli xam neft və emal olunmuş neft məhsullarının Kubaya satışına müəyyən şərtlərlə icazə veriləcəyini açıqlayıb. Bildirilir ki, satışlar təsdiqlənmiş vasitəçilər vasitəsilə həyata keçiriləcək.
Nazirliyin nəzdində fəaliyyət göstərən Xarici Aktivlərə Nəzarət İdarəsi (OFAC) bəyan edib ki, üçüncü tərəflərin Venesuela neftini və məhsullarını Kubaya yenidən satmaq üçün təqdim edəcəyi müraciətlərə baxılacaq və uyğun hesab edilənlər təsdiqlənəcək.
Əməliyyatlara nəzarət saxlanılacaq
Rəsmi açıqlamada qeyd olunub ki, qərar əsasən Kubada özəl sektorla əlaqəli və əhalini dəstəkləyən kommersiya və humanitar məqsədli əməliyyatlara şamil ediləcək.
Satışlardan əldə olunan vəsaitlərin ABŞ-ın nəzarətində olan bank hesablarında saxlanılması şərti tətbiq olunacaq. Bu mexanizm hazırda ABŞ tərəfindən icazə verilmiş Venesuelanın dövlət neft şirkəti PDVSA ilə əməliyyatlarda tətbiq olunan qaydalara uyğun olacaq.
OFAC həmçinin ABŞ şirkətləri ilə yanaşı, qeyri-amerikan şirkətlərinə də bu istiqamətdə yenidən satış icazəsi verə biləcəyini bildirib.
Enerji böhranı fonunda qərar
Kuba son dövrlər ciddi enerji çatışmazlığı ilə üzləşib. ABŞ administrasiyası qərarın humanitar məqsədlər daşıdığını bəyan etsə də, Vaşinqtonun Havana üzərində siyasi və iqtisadi təzyiqi davam etdirdiyi qeyd olunur.
Hazırda aviasiya yanacağının satışının bu qərarın əhatə dairəsinə daxil olub-olmadığı barədə dəqiq məlumat verilməyib.
Analitiklər hesab edirlər ki, bu addım bir tərəfdən Kubadakı enerji böhranını qismən yumşalda bilər, digər tərəfdən isə sanksiya rejiminin şərtləri çərçivəsində ciddi nəzarət mexanizmləri saxlanılacaq.
