Hindistan Rusiyadan neft idxalını azaldır
ABŞ administrasiyasından yüksəkvəzifəli bir rəsmiyə istinadən “Reuters” agentliyi xəbər verir ki, Hindistanın neftayırma zavodları Rusiyadan neft idxalını təxminən 50 faiz azaldıb.
Mənbənin sözlərinə görə, bu qərar Vaşinqton və Dehli arasında aparılan ticarət danışıqları nəticəsində qəbul olunub. Ağ Evin nümayəndəsi bildirib ki, danışıqlar “konstruktiv və qarşılıqlı anlaşma şəraitində” keçib və tərəflər enerji ticarəti ilə bağlı “ortaq maraqlar” əsasında addımlar atırlar.
Rəsmi təsdiq gözlənilir
Hindistan hökumətinə yaxın mənbələr isə bildiriblər ki, idxal həcminin azalmasının nəticələri hələ rəsmi statistikalarda əksini tapmayıb. Bu azalmanın dekabr və ya gələn ilin yanvar ayına aid idxal göstəricilərində özünü göstərməsi gözlənilir.
Mənbələrə görə, Hindistanın bəzi neftayırma müəssisələri noyabr ayında yüklənəcək Rusiya neftini artıq satın alıblar və bu tədarüklərin dekabr ayında ölkəyə çatacağı ehtimal edilir. Buna görə də real azalma növbəti aylarda daha aydın görünəcək.
Rəsmi göstəriş yoxdur
Hindistan hökuməti hələlik şirkətlərə Rusiyadan idxalın azaldılması ilə bağlı rəsmi göstəriş verməyib. Məsələnin daha çox siyasi və diplomatik razılaşma çərçivəsində həyata keçirildiyi bildirilir.
Ekspertlər hesab edir ki, Hindistanın bu addımı Qərb ölkələrinin Rusiyaya qarşı təzyiqlərinə uyğunlaşdırılmış bir “balans siyasəti”nin tərkib hissəsidir. Hindistan hazırda enerji təhlükəsizliyini qorumaqla yanaşı, ABŞ-la iqtisadi və siyasi münasibətləri də möhkəmləndirməyə çalışır.
Neft bazarında qiymətlər yüksəlib
Xəbər yayıldıqdan sonra neft bazarında qiymətlərdə artım müşahidə olunub. Dünən — cümə axşamı günü neftin qiyməti təxminən 1 faiz bahalaşaraq, ABŞ Prezidenti Donald Trampın Hindistanın Rusiya nefti alışını dayandıracağı barədə açıqlaması ilə əlaqələndirilib.
Analitiklər hesab edir ki, Hindistanın bu qərarı qlobal neft bazarına təsir göstərə və Rusiyanın Asiya bazarındakı payını azalda bilər.
