ABŞ-dan Livana sərt mesaj
ABŞ-ın Qərbi Asiya üzrə xüsusi elçisi Tom Barrak Bəhreyndə keçirilən “Manama Dialoq Forumu”nda Livanı “uğursuz dövlət” adlandıraraq, ölkəni “Hizbullah”ı silahsızlaşdırmağa çağırıb. O, Livandakı iqtisadi və infrastruktur böhranını əsas gətirərək bildirib ki, “ölkə faktiki olaraq dağılmış vəziyyətdədir.”
Barrakın sözlərinə görə, “Livanda mərkəzi bank yoxdur, bank sistemi çöküb, elektrik enerjisi kəsilib, insanlar generatorlardan istifadə edir, təhsil və su təchizatı isə özəl sektorun üzərinə düşür.” ABŞ rəsmisi bu vəziyyəti Vaşinqtonun tətbiq etdiyi sanksiyalardan qaynaqlanan nəticələr kimi dəyərləndirməyib.
“İsrail danışıqlara hazırdır”
Barrak iddia edib ki, İsrail rejimi sərhədlərin müəyyənləşdirilməsi ilə bağlı Livanla danışıqlara başlamağa hazırdır. O, Livan rəhbərliyini “danışıqlara qoşulmağa və sərhədlərini qorumağa” çağırıb.
“Livanda vəziyyətin bu həddə çatması yolverilməzdir. İsraillə dialoqun olmaması məntiqli deyil,” – deyə Barrak bildirib.
Elçi həmçinin Livan rəhbərliyindən “Hizbullah”ın silahlarını məhdudlaşdırmaq üçün təcili addımlar atmağı tələb edib: “Əgər ‘Hizbullah’ silahsızlaşdırılsa, Livanla İsrail arasında heç bir problem qalmaz.”
İsrailin təcavüzləri davam edir
Barrakın bəyanatı, İsrail rejiminin son illərdə Livanın suverenliyini mütəmadi şəkildə pozduğu bir vaxtda səslənib. İsrail ordusu dəfələrlə Livan ərazisinə hava zərbələri endirib, pilotsuz aparatlarla hücumlar həyata keçirib və sərhədi keçərək əməliyyatlar aparıb.
BMT-nin vasitəçiliyi ilə 2024-cü ilin 27 noyabrında əldə edilmiş atəşkəs razılaşmasına baxmayaraq, Tel-Əviv hələ də Livan ərazisindən tamamilə çıxmayıb. Rəsmi məlumatlara görə, İsrail ordusu hazırda Livanın beş məntəqəsində mövqelərini qoruyur və mütəmadi olaraq cənub və şərq bölgələrini atəşə tutur.
Bu hücumlar nəticəsində atəşkəsdən sonra 300-dən çox insan həlak olub, 650-dən çoxu yaralanıb. Ölənlər arasında qadınlar və uşaqlar da var.
“Hizbullah”dan ABŞ-a sərt cavab
“Hizbullah” Hərəkatının Baş katibi Şeyx Nəim Qasım ABŞ-ın Livana təzyiqlərini pisləyərək Vaşinqtonu “təcavüzün himayədarı” adlandırıb.
O, bildirib ki, ABŞ “bitərəf vasitəçi” deyil, əksinə, İsrailin ardıcıl hücumlarını dəstəkləyən tərəfdir. Şeyx Qasım Livan hökumətini ölkənin suverenliyini qorumağa, “işğalçını çıxarmağa” və milli ordunun İsrailin hücumlarına cavab verməsini təmin edəcək plan hazırlamağa çağırıb.
“Hizbullah”ın müqaviməti davam edir
Xatırladaq ki, “Hizbullah” 2023-cü il 7 oktyabrda İsrailin Qəzza zolağında həyata keçirdiyi hücumlara cavab olaraq fələstinlilərə dəstək məqsədilə İsrail hədəflərinə zərbələr endirmişdi.
İsrail 2024-cü ilin noyabrında Livanla atəşkəsə razılaşmağa məcbur olmuşdu. Bu, İsrailin döyüş meydanında böyük itkilər verməsi və 4000-dən çox livanlının ölümünə səbəb olan əməliyyatlarına baxmayaraq məqsədinə çata bilməməsi fonunda baş vermişdi.
