ABŞ-ın Latın Amerikasındakı yeni əməliyyatı
ABŞ-ın müdafiə rəhbərliyi Latın Amerikasında “Cənub Mizrağı” adlı yeni əməliyyat başladığını bəyan edib. Açıqlandığı iddiaya görə, əməliyyatın məqsədi “narkotik tacirlərindən gələn təhlükəni aradan qaldırmaq”dır. Buna baxmayaraq, Vaşinqton əməliyyatın miqyası və konkret hədəfləri barədə ətraflı məlumat verməkdən yayınır.
Pentagon detala varmadan açıqlama ilə kifayətləndi
ABŞ-ın müdafiə naziri vəzifəsini icra edən Pit Heqsit sosial şəbəkə hesabında əməliyyatın başlandığını bildirib. O, paylaşımında “Bu gün Cənub Mizrağı əməliyyatını elan edirəm. Məqsəd ölkəmizi qorumaq, narkotik tacirlərini zərərsizləşdirmək və xalqımızı öldürən maddələrdən müdafiə etməkdir” sözlərini yazıb.
Mətbuata açıqlama tələbinə cavab olaraq Pentaqonun sözçüsü də Heqsitin paylaşımına istinad edib və əlavə izah verməyib. Bu isə Vaşinqtonun əməliyyatın real məqsədləri və miqyasını gizlətdiyi barədə suallar yaradıb.
Karib və Sakit okean sularında artan hərbi fəaliyyət
ABŞ rəhbərliyi son həftələrdə Karib dənizi və Sakit okeanda müxtəlif hava və dəniz güclərini yerləşdirib. Bunlara “Cerald Ford” adlı nəhəng təyyarədaşıyan gəmi də daxildir. Vaşinqton bu qüvvələrin narkotik qaçaqmalçılığı ilə mübarizə üçün bölgəyə göndərildiyini iddia edir.
Lakin bu iddianı təsdiqləyən sübutlar hələ ki təqdim olunmayıb. ABŞ-ın narkotik qaçaqmalçılığı ilə əlaqəli olduğunu iddia etdiyi qayıqlar barədə də heç bir əsaslı dəlil ortaya qoyulmayıb.
Venesuelaya qarşı mümkün əməliyyatlar gündəmdə
ABŞ-ın “CBS News” telekanalının məlumatına görə, bir neçə mənbə Trampa Venesuelaya qarşı mümkün hücumlar ilə bağlı əlavə variantlar təqdim olunduğunu bildirib. Bu variantlara Venesuela ərazisinə hava zərbələri də daxildir.
Bu məlumatlar ABŞ-ın regiondakı hərbi varlığını yalnız qaçaqmalçılıqla mübarizə adı altında artırmadığını, həm də siyasi məqsədlər güdə biləcəyini göstərir.
Karakasdan sərt reaksiya: “İmperializmə cavab verəcəyik”
Venesuela hökuməti isə öz hərbi qüvvələrinin ölkə boyu genişmiqyaslı şəkildə yerləşdirildiyini açıqlayıb. Müdafiə strukturları quru, hava, dəniz və çay qüvvələrinin, həmçinin raket sistemlərinin, müxtəlif hərbi hissələrin və keçmiş hərbçilərdən formalaşan bolivar milisinin səfərbər edildiyini bildirib.
Rəsmi Karakas bu addımın “ABŞ imperializminə qarşı müdafiə tədbiri” olduğunu vurğulayıb.
Hazırkı gərginlik Vaşinqton və Karakas arasında qarşıdurmanın daha da dərinləşə biləcəyinə dair narahatlığı artırır.
