Yanacaq doldurma zamanı insident
ABŞ Cənub Komandanlığının sözçüsü Emanuel Ortiz bildirib ki, ABŞ Cənub Komandanlığının məsuliyyət zonasına daxil olan ərazidə iki hərbi gəmi toqquşub.
Onun sözlərinə görə, “USS Truxtun” esminesi ilə “USNS Supply” təchizat gəmisi açıq dənizdə yanacaq doldurma əməliyyatı zamanı bir-birinə dəyib.
Hadisə nəticəsində iki nəfər yüngül xəsarət alıb. Onların vəziyyətinin stabil olduğu açıqlanıb.
Gəmilər üzmə qabiliyyətini qoruyub
Rəsmi məlumata görə, hər iki gəmi toqquşmadan sonra üzmə qabiliyyətini saxlayıb və təhlükəsiz şəkildə hərəkəti davam etdirə bilir. Toqquşmanın dəqiq səbəbi hələlik məlum deyil və insidentlə bağlı araşdırma aparılır.
Hadisənin konkret olaraq hansı nöqtədə baş verdiyi də açıqlanmayıb.
Əməliyyat zonası və hərbi iştirak
Məlumata əsasən, insident Karib hövzəsi, Cənubi Atlantik və Cənubi Sakit okeanın bir hissəsini əhatə edən Cənub Komandanlığının məsuliyyət zonasında qeydə alınıb.
“USS Truxtun” fevralın 6-da Virciniyadakı əsas limanını tərk edərək planlaşdırılmış dislokasiyaya başlamışdı. “USNS Supply” isə Karib dənizi bölgəsində fəaliyyət göstərir.
Qeyd edək ki, Cənub Komandanlığının tabeliyində 12 hərbi gəmi mövcuddur. Onların sırasında “USS Gerald R. Ford” aviadaşıyıcısı və onun zərbə qrupu da yer alır.
Belə insidentlər nadir hallarda baş verir
Dənizdə paralel üzən iki gəmi arasında yanacaq və təchizat ötürülməsi mürəkkəb əməliyyat sayılır. Təchizat gəmiləri Hərbi Dəniz Qüvvələrinə məxsus olsa da, əsasən mülki heyət tərəfindən idarə olunur.
Hərbi gəmilərin iştirakı ilə baş verən toqquşmalar nadir hadisə hesab olunur və bəzi hallarda ağır nəticələrə səbəb ola bilər.
