ABŞ Donanmasının Yəmənlə qarşıdurma hesabatı açıqlanıb
Beynəlxalq media ABŞ Hərbi Dəniz Qüvvələrinin Yəmən ordusu (Ənsarullah) ilə Qırmızı dənizdə yaşanan gərginliklər barədə dörd ayrı araşdırma apardığını və nəticələrin narahatedici olduğunu yazır. Hesabatlara əsasən, Yəmənin davamlı raket və pilotsuz uçuş aparatı hücumları qarşısında ABŞ donanmasının struktur zəiflikləri və dözümlülük problemləri kəskin şəkildə üzə çıxıb.
Araşdırmalar göstərir ki, Yəmən ordusunun intensiv hücumları “USS Harry S. Truman” aviadaşıyıcısında həm psixoloji, həm də əməliyyat baxımından ciddi təzyiq yaradıb və nəticədə qarşısı alına biləcək dörd ayrı bahalı insident baş verib. Bu hadisələr ABŞ-a 100 milyon dollardan çox ziyan vurub və ölkənin dəniz qüvvələrinin uzunmüddətli təhdidlərə hazırlığı ilə bağlı suallar doğurub.
Uzanan missiya və Yəmən əməliyyatlarının təsiri
AP agentliyinin məlumatında bildirilir ki, “Harry S. Truman” ABŞ-ın regiona göndərdiyi üçüncü aviadaşıyıcı olub və 1403-cü ilin Azar ayında (2024-cü ilin dekabrı) Qırmızı dənizin sularına daxil edilib. İlkin altı aylıq missiya daha sonra iki ay uzadılıb və gəmi demək olar ki, hər gün Yəmən ordusunun raket və PUA hücumlarına məruz qalıb.
22 dekabr 2024-dən etibarən gəminin heyəti aktiv müdafiə rejiminə keçib. 15 mart 2025-dən (25 Esfənd 1403) isə ABŞ aviadaşıyıcısı, kruizer “USS Gettysburg”un dəstəyi ilə gündəlik hava hücum əməliyyatları həyata keçirməyə başlayıb. ABŞ Hərbi Dəniz Qüvvələri bu dövrü İkinci Dünya Müharibəsindən bəri ən şiddətli dəniz qarşıdurması adlandırır.
Yəmən hücumları Qəzza müharibəsinə cavab olaraq başladı
Hesabatlarda vurğulanır ki, Yəmən ordusu oktyabr 2023-dən (Mehr 1402) bəri Qəzza müharibəsinə cavab olaraq regiondakı İsrail, ABŞ və müttəfiq hədəflərə qarşı raket və PUA əməliyyatlarını davam etdirir. ABŞ-ın Bayden dövründəki hava bombardmanları və Tramp administrasiyasının bir aylıq hücumlarına baxmayaraq, Yəmən tərəfi əməliyyatları intensiv şəkildə davam etdirib.
Donanmanın zəif nöqtələri üzə çıxdı
Amerika tərəfinin etiraf etdiyi dörd insident, Yəmən hücumlarının yalnız taktiki deyil, həm də strateji təsir göstərdiyini ortaya qoyur. Uzunmüddətli təzyiq ABŞ donanmasının yüklənmə dərəcəsini, heyətin dözümlülüyünü və avadanlığın dayanıqlığını ciddi şəkildə sınağa çəkib.
Hərbi ekspertlər bildirirlər ki, Qırmızı dənizdəki qarşıdurma ABŞ-ın gələcək dəniz strategiyasına yenidən baxmasını zəruri edir və bu hesabatlar donanmanın modernləşməsi üçün ciddi siqnal hesab olunur.
