ABŞ hərbi gəmisində psixoloji böhran
İranla yaşanan qarşıdurmalar səbəbindən Qərbi Asiyada fəaliyyət göstərən ABŞ-ın “Abraham Lincoln” aviadaşıyıcısında ciddi psixoloji problemlərin yarandığı bildirilir.
Məlumata görə, gəmidə xidmət edən təxminən 5 min hərbçi uzunmüddətli missiya, ağır yaşayış şəraiti və xidmət müddətinin dəfələrlə uzadılması səbəbindən ciddi fiziki və psixoloji təzyiqlə üzləşib.
Aviadaşıyıcının heyətinin təxminən 250 gündür quruya çıxmadan dənizdə olduğu bildirilir. Bəzi hərbçi ailələrinin sözlərinə görə, vəziyyət o həddə çatıb ki, ayrı-ayrı əsgərlər özlərini dənizə ataraq həyatlarına son qoymağa cəhd ediblər.
Missiyanın müddəti dəfələrlə uzadılıb
“Abraham Lincoln” 2025-ci ilin noyabrında San-Dieqodan yola düşüb. İlkin plana əsasən, aviadaşıyıcının may ayında geri qayıtması nəzərdə tutulurdu.
Lakin Yaxın Şərqdə davam edən hərbi əməliyyatlar səbəbindən gəminin xidmət müddətinin bir neçə dəfə uzadıldığı bildirilir.
Aviadaşıyıcının 250 gündür fasiləsiz dənizdə qalmasının müasir dövrdə bu tip ABŞ hərbi gəmiləri üçün rekord göstərici olduğu qeyd edilir.
Hərbçi ailələrindən həyəcanlı açıqlamalar
ABŞ hərbi mətbuatına danışan bəzi hərbçi ailələri xidmət müddətinin uzadılmasından sonra gəmidəki şəxsi heyətin psixoloji vəziyyətinin ağırlaşdığını bildiriblər.
San-Dieqoda ABŞ Hərbi Dəniz Qüvvələrinin rəsmiləri ilə keçirilən görüşdə hərbçilərdən birinin yaxını həyat yoldaşından olduqca narahatedici mesaj aldığını söyləyib. Onun sözlərinə görə, hərbçi növbəti gün oyanmamağı arzuladığını yazıb.
Bu açıqlamalar gəmidəki şəxsi heyətin psixoloji vəziyyəti və uzunmüddətli missiyanın doğurduğu nəticələrlə bağlı müzakirələri daha da gücləndirib.
Gəmidə ağır yaşayış şəraiti
ABŞ Konqresinin üzvü Mayk Levin də aviadaşıyıcıdakı yaşayış şəraiti ilə bağlı ciddi problemlərin olduğunu bildirib.
Onun sözlərinə görə, bəzi duş kabinələrində kif yaranıb, ayaqyolular sıradan çıxıb, camaşırxanalar həftələrlə işləməyib və isti su təminatında fasilələr müşahidə olunub.
Bundan başqa, sabun, diş məcunu və tər əleyhinə vasitələr kimi gündəlik şəxsi gigiyena məhsullarının çatışmadığı qeyd olunur.
Ərzaq təminatındakı problemlər səbəbindən yeməklərin məhdud paylarla verildiyi də irəli sürülüb.
ABŞ Hərbi Dəniz Qüvvələri açıqlamaları rədd edir
Məsələ ilə bağlı açıqlama verən ABŞ Hərbi Dəniz Qüvvələri uzunmüddətli missiyaların hərbçilər və onların ailələri üzərində ciddi təzyiq yaratdığını qəbul edib.
Bununla belə, qurum mövcud məlumatlara əsasən, gəmidə intihara cəhd və ya intihar düşüncələri ilə bağlı hallarda artım qeydə alınmadığını bildirib.
Hərbi rəhbərlik aviadaşıyıcıda mütəxəssis məsləhətçilərin və din xadimlərinin fəaliyyət göstərdiyini açıqlayıb. Eyni zamanda, gəmidə təmiz su, işlək havalandırma sistemi və sağlam qida təminatının fasiləsiz olduğu iddia edilib.
Senatda araşdırma tələbi
ABŞ Senatının Silahlı Qüvvələr Komitəsinin üzvü Riçard Blumental isə yayılan açıqlamalardan sonra məsələni rəsmi səviyyəyə çıxarıb.
O, ABŞ Müdafiə Nazirliyinə və Hərbi Dəniz Qüvvələri rəhbərliyinə müraciət edərək “Abraham Lincoln” aviadaşıyıcısındakı yaşayış şəraitinin, hərbçilərin sağlamlıq vəziyyətinin və təhlükəsizlik hadisələrinin araşdırılmasını tələb edib.
Beləliklə, Yaxın Şərqdəki hərbi gərginlik fonunda ABŞ-ın əsas aviadaşıyıcılarından birində yaranmış vəziyyət Vaşinqtonda da müzakirə mövzusuna çevrilib.
