Google-a 2,95 milyard avro cərimə
Avropa Birliyi (AB) Komissiyası, ABŞ mənşəli texnologiya nəhəngi Google-a rəqabət qaydalarını pozduğu üçün 2,95 milyard avro məbləğində cərimə tətbiq edib.
Reklam bazarında sui-istifadə ittihamı
Komissiyanın açıqlamasına görə, Google reklam texnologiyası sahəsində öz xidmətlərinə üstünlük verərək rəqiblərinin bazar imkanlarını məhdudlaşdırıb. Araşdırmada şirkətin illərdir rəqabəti pozan mexanizmlərdən istifadə etdiyi təsdiqlənib.
AB Komissiyası həmçinin Google-a təchizat zəncirində maraq toqquşmalarını aradan qaldırmaq və rəqabəti pozan üstünlük siyasətini dayandırmaq barədə göstəriş verib. Şirkət bu barədə 60 gün ərzində rəsmi cavab təqdim etməlidir.
Uzunmüddətli araşdırmanın nəticəsi
Google-un rəqabət pozuntuları ilə bağlı ilk istintaq 2021-ci ildə başlamışdı. 2023-cü ildə Komissiya şirkəti rəqiblərini sıxışdırmaq və reklam bazarında süni üstünlük əldə etməkdə rəsmi olaraq ittiham etmişdi.
Məlumata görə, 2014-cü ildən bəri Google öz xidmətlərini reklam seçimlərində önə çıxarmaqla həm bazar mövqeyini gücləndirib, həm də rəqiblərinə qarşı qeyri-bərabər şərtlər yaradıb. Bu praktika şirkətə daha yüksək xidmət haqları toplamağa imkan verib.
AB-nin səlahiyyətləri və əvvəlki qərarlar
AB Komissiyası üzv ölkələrdə fəaliyyət göstərən iri şirkətlərin bazar davranışlarını izləyir və rəqabəti pozan hallara müdaxilə edir. Qaydaları pozan şirkətlərə ciddi sanksiyalar tətbiq edilir.
Son illərdə Google müxtəlif araşdırmalar nəticəsində ümumilikdə 8 milyard avrodan çox cərimə ödəməyə məcbur edilib.
Siyasi gərginlik
Bəzi mənbələr bildirir ki, bu qərarın açıqlanması əvvəlcə gecikdirilib. Səbəb kimi isə AB-ABŞ ticarət münasibətlərinə mənfi təsir göstərə biləcəyi ehtimalı göstərilib. Komissiyanın ticarətdən məsul üzvü Maroš Šefčovič-in qərarın elanını müvəqqəti dayandırdığı iddia olunub.
