Tramp: “Qəzza müharibəsi illərlə davam edəcəkdi, mən dayandırdım”
ABŞ-ın keçmiş prezidenti Donald Tramp, “Time” jurnalına verdiyi geniş müsahibədə Qəzza müharibəsi, Fələstin rəhbərliyi və İsrailin Baş naziri Binyamin Netanyahu ilə münasibətləri barədə diqqətçəkən açıqlamalar verib.
Tramp bildirib ki, onun müdaxiləsi olmasaydı, Qəzza müharibəsi illərlə davam edəcəkdi:
“Bu müharibə illərlə sürə bilərdi. Mən onu dayandırdım və bu qərar nəticəsində bütün tərəflər inanılmaz şəkildə bir araya gəldi.”
Tramp, Fələstin tərəfinin hazırda aydın liderlikdən məhrum olduğunu vurğulayıb. Onun sözlərinə görə, Fələstin xalqı “liderlərinin bir çoxunun qətlə yetirilməsi səbəbindən” rəhbərlik boşluğu ilə üz-üzədir:
“Fələstinlilərin bu gün aydın rəhbəri yoxdur. Keçmiş liderlərdən bir neçəsi öldürüldü, bu da rəhbərliyi dağınıq vəziyyətə saldı.”
Mərvan Barqutinin azadlığı gündəmdə
Tramp müsahibəsində bəzi media orqanlarının iddialarına da münasibət bildirib. Onların yazdığına görə, o, fələstinli məhbus Mərvan Barqutinin azad edilməsini dəstəkləyib.
Tramp bu barədə suala cavabında belə deyib:
“Bu məsələ bu gün mənə də təqdim olundu. Hələ qərar verməmişəm, amma məsələ gündəmdədir və mən bunu ciddi şəkildə nəzərdən keçirəcəyəm.”
Barquti uzun illərdir İsraildə həbsdədir və bir çox fələstinli tərəfindən potensial milli lider kimi qəbul olunur.
“Netanyahu dayanmağa məcbur idi”
Tramp, müsahibənin davamında İsrail Baş naziri Binyamin Netanyahu ilə münasibətlərindən də danışıb:
“Netanyahu dayanmaq məcburiyyətində idi, çünki dünya onu dayandıracaqdı. İsrail həmin vaxt sürətlə beynəlxalq dəstəyini itirirdi.”
Tramp əlavə edib ki, Qətərdə baş verən bəzi addımları “taktiki səhv” adlandırsa da, bunun son nəticədə “bölgədə mövqelərin aydınlaşmasına və tərəflərin hərəkətə keçməsinə səbəb olduğunu” söyləyib.
“Bütün əməliyyatlar mənim rəhbərliyimlə həyata keçirildi”
“Time” jurnalının baş siyasi müxbiri Erik Kortilisa Trampdan ikinci prezidentlik dövründə bölgədə baş verən dəyişikliklər – xüsusilə “Hizbullah rəhbərliyinə qarşı əməliyyatlar” və “Suriyada hökumət dəyişikliyi” barədə soruşduqda, Tramp bunların “öz rəhbərliyi və koordinasiyası ilə həyata keçirildiyini” iddia edib:
“Bütün o əməliyyatlar mənim nəzarətim altında aparıldı. İsrail həmin əməliyyatlarda çağırış cihazlarından və müxtəlif texnoloji vasitələrdən istifadə etdi.”
Bu iddialar beynəlxalq mediada böyük rezonans doğurub, çünki həmin dövrdə Tramp ABŞ prezidenti seçilməmişdi.
