İsrail ordusuna Qəzzada ağır zərbə
İsrail mediasının məlumatına görə, sentyabrın 18-də Qəzzada İsrail ordusuna məxsus “Hammer” tipli hərbi maşının partladılması nəticəsində 4 əsgər həlak olub, 8 nəfər isə yaralanıb.
Hadisə barədə yayılan məlumatlarda qeyd olunur ki, partlayış baş verən ərazi İsrail ordusu tərəfindən “təhlükəsiz zona” kimi qiymətləndirilirdi. İsrail mətbuatında bu hadisə “çox ağır və şokedici” kimi təqdim olunub.
Müqavimətdən yeni hücum
Eyni gün Fələstin müqavimət qrupları İsrail ordusuna qarşı əməliyyatlarını davam etdirdi. “Mücahidin Briqadaları” açıqlama verərək Qəzzanın Zeytun məhəlləsində, Məsalibə bölgəsində İsrail ordusuna məxsus “Merkava” tankının “Səir” tipli tank əleyhinə raketlə vurulduğunu və zirehli texnikanın birbaşa zərbə aldığını bildirib.
Müqavimət əməliyyatları davam edir
Son günlərdə Qəzzada İsrail ordusuna qarşı hücumların intensivləşdiyi müşahidə olunur. Müqavimət qrupları pusqu, partlayış və raket hücumları ilə işğalçı qüvvələrə ciddi itkilər yetirməkdədir. İsrail ordusu isə bölgədə hərbi əməliyyatlarını davam etdirərək Qəzzanın müxtəlif hissələrində ağır bombardmanlar həyata keçirir.
Ekspertlər hesab edirlər ki, Qəzzada davam edən döyüşlər İsrail ordusu üçün ciddi çətinliklər yaradıb və itkilərin artması işğalın dərin böhranla üz-üzə qaldığını göstərir.
