az.rasthaber.com xəbər verir ki, İsrailin “Haaretz” qəzeti cümə axşamı dərc etdiyi redaksiya məqaləsində rejimin hər gün daha da böyüyən bir fəlakətə doğru sürətlə getdiyini yazıb.
Məqalədə qeyd olunur ki, Qəzza zolağında aparılan müharibə bütün məntiqli təhlükəsizlik və humanitar çərçivələri aşıb. “Həmasın məğlub edilməsi, Qəzzada təhlükəsizlik nəzarətinin təmin olunması və əsirlərin qaytarılması barədə danışmaq artıq mövcud reallıqlarla heç bir əlaqəsi olmayan şüarlardır,” – deyə qəzet vurğulayıb.
Baş Qərargah rəisi Eyəl Zamirin Qəzza şəhərinin işğalı planı ilə bağlı xəbərdarlıqlarını xatırladan qəzet, “Gideonun Arabaları 2” əməliyyatının təhlükəsizlik baxımından əsası olmadığını bildirib.
Haaretz yazır ki, təhlükəsizlik qurumlarının rəhbərləri əsir mübadiləsi razılaşmasının qaçılmaz olduğunu qəbul edərək, bunun əsgərlərin və əsirlərin həyatı, ordunun tükənməsi və Qəzzanın hərbi idarəçiliyə sürüklənməsi baxımından ağır bədələ səbəb olacağını vurğulayıblar. Beləliklə, hökumətin ənənəvi “təhlükəsizlik” şüarlarının artıq işə yaramadığı qeyd olunur.
Qəzet, əsir ailələrinin hökumətin reallıqdan uzaq və kompromisə getməyən mövqeyi ilə üz-üzə qaldığını yazır. Ailələrin etirazlarla kabineti mövqeyini dəyişməyə məcbur etməyə çalışmasına baxmayaraq, Baş nazir Benyamin Netanyahu siyasi qazanc əldə etdiyi üçün müharibəni davam etdirməkdə israrlıdır.
Nəticə olaraq qəzet xəbərdarlıq edib: “Qəzzanın dağıdılması və İsrailin çökməsi prosesini artıq heç kim dayandıra bilməz.” Haaretz müharibənin dərhal dayandırılmasına, əsirlərin qaytarılmasına və ərəb dövlətlərinin irəli sürdüyü “müharibədən sonrakı gün” planının qəbul edilməsinə çağırıb. Əks halda, fürsətin çox tez itiriləcəyi və hər şey üçün gec olacağı bildirilib.
